Paraburgimi prej 30 ditësh i është caktuar të dyshuarit për vrasjen e një njëzetvjeçari në Ferizaj më 18 gusht.
Caktimin e kësaj mase të sigurisë e konfirmoi për KALLXO.com zëdhënësja e Gjykatës Themelore në Ferizaj Albënora Bekteshi.
“Të shtunën i është caktuar paraburgimi prej 30 ditësh të dyshuarit për vrasjen në Ferizaj,” tha Bekteshi.
Ajo bëri të ditur se masën e paraburgimit e kishte kërkuar prokuroria.
Vrasja e para pesë ditëve kishte ndodhur në Rrugën “Rexhep Bislimi” të Ferizajt, ndërsa policia e kishte gjetur viktimën pa shenja jete në hyrjen e një ndërtese të banimit kolektiv.
I dyshuari për vrasje, gjithashtu 20 vjeçar, ishte arrestuar një ditë më vonë, ndërsa policia nuk kishte dhënë motivet e këtij krimi.
