Ministri i Drejtësisë, Abelard Tahiri ka bërë të ditur se ka bërë procedimin në Qeveri të dy pikave, me të cilat ministria e tij përmbush të gjitha obligimet ndaj Agjendës së Reformave Evropiane (ERA).
Sipas Tahirit, Projektligji për Prokurorin e Shtetit dhe Koncept Dokumenti për Suspendimin e Zyrtarëve Publikë, ndaj të cilëve ngriten aktakuza për korrupsion dhe keqpërdorim të detyrës zyrtare, do ta fuqizojnë edhe më shumë integritetin e institucioneve.
Ky është postimi i plotë:
Kam proceduar në Qeveri dy pika, me të cilat ministria që unë drejtoj përmbush të gjitha obligimet ndaj Agjendës së Reformave Evropiane (ERA). Projektligji për Prokurorin e Shtetit dhe Koncept Dokumenti për Suspendimin e Zyrtarëve Publikë, ndaj të cilëve ngriten aktakuza për korrupsion dhe keqpërdorim të detyrës zyrtare, do ta fuqizojnë edhe më shumë integritetin e institucioneve tona në luftën e pa kompromis kundër krimit të organizuar dhe korrupsionit. Me miratimin e këtyre akteve, ne do të kemi një politikë të konsoliduar shtetërore që përçon mesazhin e qartë se askush nuk është mbi ligjin dhe se të gjithë, pa përjashtim, do të jenë subjekt i tij.