Agjencia Kosovare e Privatizimit, në këtë vit ka pasur rritja të jashtëzakonshme të të hyrave. Ato janë siguruar nga qiratë e aseteve shoqërore. Që nga marrja e vendimit për lirimin e aseteve nga uzurpatorët më 21 nëntor 2014 e deri me 20 dhjetor 2016 janë inkasuar 7.2 milion euro nga qiradhënia e aseteve apo 63 për qind më shumë sa tërë inkasimi i qirasë në vlerë 4.4 milion që është realizuar në 12 vitet e fundit.
Këto shifra të të hyrave kanë dal nga prezantimi i punën që AKP-ja e ka bërë për lidhur me të arriturat e vit 2016.
“Është bërë shpërndarja e 20 % për punëtorët e Ndërmarrjeve Shoqërore në vlerë prej 5,591.678 Euro. Është rritur efikasitetit në administrimin, kontrollimin dhe monitorimin e NSh-ve, Spin-Offet speciale dhe privatizimeve me kushte. Trajtimi i aseteve të uzurpuara apo të shfrytëzuara pa bazë ligjore nga palët e treta (nga numri prej 217 persona të klasifikuar në listën e uzurpatorëve në fund të vitit 2015, në fund të periudhës raportuese ky numër është 56 raste)”, thuhet në Raportin e AKP-së, transmeton lajmi.net.
Po ashtu, si sukses, sipas AKP-së ka qenë edhe krijimi i linjës së veçantë telefonike pa pagesë (0) 800 50040, e cila do të përdoret për ofrimin e informacioneve nga qytetarët në dobi të AKP-së, apo edhe shpërndarja e mjeteve kreditorëve për 117 NSH.
Shitja e aseteve
“Gjatë vitit 2016 AKP ka kompletuar infrastrukturën e shitjes për shitjet me tender publik, duke hartuar Rregullat e Reja të Tenderit dhe Procedurat e Shitjes si dhe Komisionet adekuat për kryerjen e shitjeve”, ka bërë të ditur AKP-ja
Po ashtu, Agjencia ka realizuar një valë të shitjes së aseteve, Shitjen e Aseteve 27 (SHAL27) duke tenderuar 53 asete dhe për të cilat ka pranuar gjithsej 216 oferta, prej të cilave Bordi i Drejtorëve i ka aprovuar 49 shitje, përderisa për 4 asete nuk ka pasur fare oferta. Gjithsej numri i aseteve të shitura për periudhën Qershor 2002 – Dhjetor 2016 është 1,296.
Likuidimi i ndërmarrjeve shoqërore
Sipas të dhënave të kësaj agjencie, numri total i NSH-ve për të cilat ka filluar procesi i likuidimit është 463.
“Gjatë periudhës raportuese janë dorëzuar 244 kërkesa kreditore, përderisa janë shqyrtuar dhe dërguar 270 vendime tek pretenduesit. Autoritetet e Likuidimit të NSH-ve në Likuidim kanë përgatitur raportet për shpërndarje për 117 Ndërmarrje Shoqërore. Shuma e shpërndarjes arrin vlerën 17,414,397.15 euro. Me dt. 8 gusht 2016 është nënshkruar aneksi 2 i kontratës për Projektin e Likuidimit me ç’rast janë emëruar Kryesuesit dhe Anëtarët e AL-ve për shumicën e NSH-ve në likuidim”.
Objektivat e AKP-së për vitin 2017
AKP-ja për vitin e ardhshëm ka shënjestër një varg objektivash. Disa nga to janë:
Zbatimi i strukturës së përgjithshme organizative të Agjencisë;
Përgatitja e akteve nënligjore dhe procedurave tjera sa i përket procesit të shitjeve dhe trajtimit në mënyra tjera të aseteve të NSH-ve, duke përfshirë këtu shqyrtimin e metodave alternative të shitjeve (përveç atyre të cilat i përdorë tani Agjencia);
Realizimi i gjithsej 12 valëve të shitjeve të aseteve përmes likuidimit;
Identifikimi i aseteve të mbetura dhe përcaktimi se me çfarë metode mund të bëhet tjetërsimi i tyre;
Integrimi i të gjitha raporteve lidhur me menaxhimin e aseteve në një sistem të integruar të raportimit;
Përfundimi i përgatitjes së raporteve të përcaktimit të statusit të Ndërmarrjeve apo aseteve të tyre se a janë apo jo nën autoritetin administrativ të Agjencisë;
Përcaktimi i numrit final të NSH-ve të cilat nuk kanë asete fare;
Vendosja e të gjitha Ndërmarrjeve Shoqërore në likuidim;
Pagesat për kreditorët e NSH-ve në likuidim:
Shpërndarja e parakohshme për rastet kur është e mundshme;
Shpërndarja përfundimtare e mjeteve të kreditorët e NSH-ve.
Përgatitja dhe publikimi i listave të punëtorëve për NSH-të që kanë hyrë në likuidim, por që nuk kanë asete të shitura;
Rishikimi i rregulloreve aktuale dhe dispozitave ligjore aty ku është e nevojshme për të zbatuar në mënyrë efektive objektivat
Përfundimi i shqyrtimit të të gjitha kërkesave të palëve për shitjen e banesave të NSH-ve; dhe
Trajtimi i aseteve jashtë Kosovës.
Sfidat kryesore në periudhën e ardhshme
Përshpejtimi i procesit të shitjes dhe trajtimit të aseteve në mënyra tjera;
Pagesa e mjeteve të shpronësimit nga Qeveria e Republikës së Kosovës për shpronësimet e vendosura në pronat shoqërore.
Bashkëpunimi me Komunat në ofrimin e shërbimeve kadastrale në mënyrë ekspeditive;
Mungesa e stafit deficitar siç janë Zyrtarët Kadastral, etj.