Pas dy ditë kërkimesh 18 vjeçarja Donjeta Avdiaj, për të cilën u kërkua edhe nëpërmjet mediave, u lajmërua vetë në polici. Por sot nuk u lejua që të kontaktojë me familjarët.
Mujë Avdijaj kërkoi në polici gjetjen e vajzës 18 vjeçare, Donjetën e cila të premten nuk ishte kthyer në shtëpi nga kursi i gjermanishtes.
Për gjetjen e saj ishte bërë thirrje edhe nëpërmjet mediave.
“Çika prej të premtes, 10:30 ora u kanë tu shku në shkollë për gjuhën gjermane dhe prej asaj kohe nuk dijmë sen për të deri më sot”, tha babai i saj për Klan Kosovën.
Paraprakisht babait i kishin ardhë informacione se vajza ishte parë edhe në Gjakovë. Por në Prishtinë ajo u paraqit vetë te një taksist të cilit i kërkoi që nga stacioni i autobusëve ta dërgonte në stacionin policor.
Këtë e ka konfirmuar vetë taksisti pa dashur të japë më shumë detaje.
Pas procedurave vajza është kthyer në stacionin e policisë në Pejë.
Por babai i saj mohon se vajza ka pasur probleme veçse dyshon se ajo u mashtrua.
“Sa e di unë sen probleme s’ka pasë familjare as asgjë. Kjo veç mundet me qenë naj mashtrim që i kanë bërë çikës. E kanë tërheq edhe erdh rasti që sot me u dorëzu në polici”, theksoi ai.
Megjithatë familjarët nuk janë lejuar të takohen me vajzën derisa policia dhe prokurori i rastit po hetojnë akoma shkakun.
Sipas babait ajo është ndaluar në polici për 24 orë me arsyetimin se i nevojitet qetësim.
Zyrtarisht policia nuk ka dhënë asnjë hollësi tjetër për rastin përveç konfirmimit se 18 vjeçarja ka shkuar vetë në stacion në Prishtinë.