Basha në Shkodër: Dy orët më speciale të 105 vjetorit të Pavarësisë

28.11.2017 23:50:31

Kryetari i Partisë Demokratike, Lulzim Basha, ka vizituar mbrëmjen e sotme qytetin e Shkodrës për të marrë pjesë në koncertin e organizuar me rastin e 105 vjetorit të pavarësisë.

Përmes një mesazhi në rrjetin social Facebook, Basha shkruan se kjo ishte një mbrëmje speciale për të.

Siç duket një mbrëmje që e mbajti larg festimeve të Tiranës dhe pritjes së organizuar nga Presidenti Meta.

“Në Shkodër shkoj gjithnjë me gëzim, por sonte në Festën e Flamurit gjithçka ishte speciale në qytetin tim shumë të dashur. Bashkia e Shkodrës, me elitën artistike shkodrane dhe bandën muzikore të qytetit, organizoi një koncert të mrekullueshëm, të denjë për skenat prestigjioze europiane. Ishin 2 orët më speciale të 105 vjetorit të Ditës së Pavarësisë!

Faleminderit Shkodra!

Gëzuar 28 Nëntorin!”, shkruan Basha.

Festimet e 28 Nëntorit në Shkodër kulmuan me spektaklin e fishekzjarreve në sheshin që mban emrin e një prej figurave kryesore të Shpalljes së Pavarësisë, atë Luigj Gurakuqi.

Për minuta të tëra qytetarët shkodranë kanë shijuar pamjet e fishekzjarreve shumëngjyrëshe në sheshin kryesor të qytetit.