Berisha tha se Kisha Serbe nuk ka monopol etnik dhe as të drejtë historike në Kosovë.
Këto komente zëvendësministri i bëri në profilin e tij zyrtar në rrjetin social Facebook duke shtuar se konstatime të këtilla nga Irinej janë për të ardhur keq dhe jashtë frymës së festës.
Ai ka përfunduar se kjo logjikë e Kishës Ortodokse Serbe nuk përputhet fare me realitetin historik dhe gjendjen aktuale sepse Kosova është e çliruar nga kolonizimi serb.
Statusi i plotë:
Reagim ndaj deklaratës se patriarkut serb Irinej, se Kisha Ortodokse Serbe (KOS) nuk mund ta imagjinojë Serbinë pa Kosovën.
KISHA SERBE NUK E KA MONOPOLIN ETNIK TË KRISHTERIZMIT RRJEDHIMISHT AS TË DREJTËN HISTORIKE NË KOSOVË
Intervista e Krishtlindjeve patriarkut serb Irinej se Kisha Ortodokse Serbe (KOS) nuk mund ta imagjinojë Serbinë pa Kosovën, se Kosova është Serbia e Vjetër, nga e cila ka lindur pjesa tjetër e Serbisë si dhë nënvizimi i tij se “Kosova është historia serbe, kultura dhe shpiri i saj, se Prizreni ka qenë kryeqytet i popullit serb e Patrikana e Pejës rezidencë e argjipeshkëv dhe e patriarkëve serbë.” – janë konstatime për keqardhje dhe jashtë frymës së festës.
Referimi i konteksteve historike të kohëpaskohshme është përpjekje që periudhat kolonialiste të Serbisë në Kosovë për t’i paraqitur si e drejtë historike që i takon popullit serb duke përjashtuar shqiptarët si banorë të këtyre trojeve si dhe duke ua mohuar atyre kulturën duke përfshirë edhe atë krishtere.
Fetë, janë universale në natyrën e vet dhe cdo interpretim subjektiv e margjinal për të nxjerrë krishterizmin si monopol etnik serb ne këtë rajon është tendenciozitet malicioz në kundërshtim me nevojen sublime për të mbrojtur trashëgiminë kulturore të Kosovës.
Kjo logjikë e KOS nuk është në përputhje me realitetin historik e as me gjendjen faktike aktuale, ngase Kosova është çliruar nga kolonizimi serb, është shtet i pavarur, në të cilin të gjithë shtetasit e saj i kanë të garantuara të drejtat e tyre qytetare, etnike, kulturore dhe fetare.
