Blerim Shala: Kurti duhet të merret njëkohësisht me prioritetet e caktuara

06.03.2021 14:52:31

Analisti politik, Blerim Shala, ka thënë se kryeministri në ardhje, Albin Kurti, duhet të merret njëkohësisht me prioritetet që i ka caktuar për të mos shkaktuar pasoja.

Ai ka shtuar se ekzistojnë relacione të varshmërisë të drejtpërdrejtë në mes prioriteteve, prandaj edhe s’duhet pritur të përfundojë me njërën për të filluar me tjetrën.

“Renditja e prioriteteve qeverisëse, sipas kryeministrit në ardhje, është reflektim i ‘nervit popullor’ të prezantuar në hulumtimet e opinionit. Në këto matjet e disponimit dhe interesimeve të qytetarëve të Kosovës, sipas Kurtit, dialogu (me Serbinë), del të jetë prioritet i gjashtë apo i shtatë, teksa ky, në shprehje të vullnetit të tij të mirë për t’i marrë parasysh synimet e Washingtonit dhe Brukselit, e ka avancuar dialogun në disa vende më lartë, duke e ranguar atë në vendin e katërt. Treshi i prioriteteve kryesore të Qeverisjes Kurti përbëhet prej: punësimit, drejtësisë, pandemisë (marrjes me pasojat nga COVID-19)”.

Ai ka thënë se renditja e tillë e prioriteteve nga qeveria e ardhshme nuk ka dhe nuk mund të ketë relacione të përjashtimit të akëcilit prej tyre.

“Nuk ka hierarki të prioriteteve e cila shfaqet në atë mënyrë, sipas të së cilës, ta zëmë, nuk mund të kalohet në prioritetin Nr.4, në atë që lidhet me zhvillimin e bisedimeve në Bruksel, pa i përmbushur në plotëni këto tri prioritetet e para të Qeverisjes Kurti, që përkojnë me punësimin, drejtësinë dhe pandeminë”.

“Qeveria e ardhshme e Kosovës pra mund dhe duhet të merret njëkohësisht me këto prioritete, të cilat, zatën, janë reflektim jo vetëm i interesimeve të qytetarëve të Kosovës, por po ashtu, janë pasqyrim i përbërjes së Qeverisë së Kosovës (me të gjitha Ministritë që i ka kjo Qeveri)”.

Shala ka thënë se Qeveria Kurti II do të mund të merret njëkohësisht me përmirësimin e rrethanave politike, ekonomike dhe juridike, për të mundësuar investimet direkte nga jashtë dhe zhvillimin e sektorit privat në Kosovë (të cilat do ta ulin ndjeshëm papunësinë), me fuqizimin e rendit dhe ligjit, por edhe me dialogun në Bruksel dhe avancimin e proceseve të integrimeve  euroatlantike, të cilat, sipas tij,  janë aktualisht në një status të ngrirjes së plotë, ku hisen më të madhe për këtë gjendje e ka BE-ja dhe jo vetë Kosova.

Shala është i mendimit që prioritet urgjent është marrja me pasojat e COVID-19.