Në edicionin sontëm “Drejtësia në Kosovë” transmetoi emisionin për arrestimin dhe paraburgimin e drejtorit rajonal të policisë në Mitrovicë Nehat Thaqit, nga ana e policisë serbe.
Kur ishte pyetur nga DnK-ja, Shukri Buja, ish komandant i UÇK-së për Zonën e Nerodimes, aktualisht deputet në Kuvendin e Kosovës, shpjegon deklaratat e tij në Kuvend të dhëna për Thaqin.
“Ajo çka unë kam deklaruar është publike, listat e ushtarëve janë publike. Nehat Thaqi nuk është arrestuar pse ka qenë në UÇK po pse është shqiptar dhe është drejtor i Policisë së Kosovës”, tha Buja i cili shtoi se lirimi i tij varet nga politika.
“Lirimin e Thaqit nuk e bëjnë avokatët mbrojtës, lirimin e Thaqit e bën politika”, theksoi Buja.
Ai këto komente i bëri pasi u pyet nga emisioni rreth deklarimeve të tij në kuvend së Thaqi ka qenë ushtar i UÇK-së. Ndërsa në anën tjetër Thaqi, sipas avokatit të tij Vladimir Gajiq, kishte deklaruar ne prokurorinë serbe se nuk ka qenë pjesë e UÇK-së.
Njëri nga avokatet e Thaqit në Serbi, Vladimir Gajiq, ka thënë se deklarata e deputetit Shukri Buja i ka bërë dëm Thqçit kur deklaroi se Thaqi ishte pjesë e UÇK-së.
“Kjo ka qenë një deklaratë e cila nuk i ka ndihmuar fort. Te ne gazetarët dolën dhe thanë së janë demantuar avokatët e Nehatit ndërkaq ne kemi thënë vetëm atë çka Nehati ka thënë para prokurorisë”, theksoi Gajiq për emisionin “Drejtësia në Kosovë”.
Deputeti i PDK-së Shukri Buja kishte deklaruar në seancën e kuvendit se Thaqi ka qenë ushtar i UÇK-së, deklaratë kjo e kundërt me deklarimit e nënkolonelit të policisë para prokurorisë serbe.
