Lajmi.net ka siguruar agjendën e këtij debati i cili pritet të fillojë në orën 10:15 minuta, pasi nga ora 9:45 do të fillojë hyrja dhe regjistrimi i të pranishmëve, raporton lajmi.net.
Sipas agjendës, kryetari i Kuvendit të Kosovës, Kadri Veseli, është parashikuar të flasë nga ora 10:15 deri në orën 10:25.
Pastaj për një orë do të jetë komisioni Shtetëror për Përcaktimin e Kufirit që me gjasë do të përfaqësohet nga Murat Meha, kryetar i komisionit që do të paraqesë të gjitha dokumentet përkatëse.
Për dhjetë minuta, nga ora 12:25 deri në orën 12:35, do të flasë edhe ambasadori amerikan në Kosovë, Greg Delawie, raporton lajmi.net.
Nga ora 12:35, pritet të jetë pjesa më interesante e krejt këtij debati pasi do të nisë edhe diskutimi i hapur nga ana e pjesëmarrësve.
Më pas edhe anëtarët e Komisionit do të jenë ata që do të përgjigjen në pyetjet e të pranishmëve.
Tashmë praninë në këtë debat e kanë konfirmuar ekspertë dhe zyrtarë të ndryshëm politik nga pozita e opozita.
Nga ana e tij, Kuvendi i Kosovës nëpërmjet njoftimit zyrtar deklaron se të mërkurën do të mbahet debati profesional-shkencor mes Komisionit shtetëror për Shënjimin e kufirit dhe Grupit të njohësve që kanë kërkuar debatin për diskutim dhe ballafaqim faktesh për çështjen e shënjimit të kufirit, Kosovë – Mali i Zi.
Kuvendi ka njoftuar se debati do të jetë i hapur edhe për mediat dhe për televizionet që duan ta transmetojnë direkt këtë ngjarje.
