Dekreti për Haradinajn, si veprim i mençur Presidenti i Shqipërisë

25.04.2017 11:03:02
Nga Azem Parllaku
Bujar Nishani, nënshkroi dje, dekretin për dhënien e nënshtetësisë shqiptare ish-kryeminstrit të Kosovës, Ramush Haradinaj, i cili u ndalua në janar të këtij viti në aeroportin e Baselit nga policia franceze mbi bazën e një urdhër-arresti ndërkombëtar të Serbisë duke u lënë të mbrohet në liri. Dekreti i Presidentit Nishani për dhënien e nënshtetësisë shqiptare për Ramush Haradinajn vjen në kohën kur, ish-kryeministri i Kosovës ndodhet në Francë në pritje të një vendimi të gjykatës franceze në Colmar me kërkesë të Beogradit zyrtar për ekstradim e tij në Serbi, me qëllim përballjen me akuzat, për krime të kryera gjatë luftës në Kosovë. Ndalimi i Haradinajt në Francë ka ngjallur reagime të forta në Kosovë dhe Shqipëri. Kuvendi i Kosovës ka miratuar një rezolutë për pezullimin e bisedimeve me Serbinë deri në lirimin e ish-Komandantit të Ushtrisë Çlirimtare të Kosovës. Autoritetet serbe kanë paraqitur në gjykatën e Colmarit prova, të reja për krimet e kryera gjatë luftës që nuk janë dorëzuar gjatë gjykimit të zotit Haradinaj në vitin 2008 e 2012 në Gjykatën për krime lufte në Hagë, e cila e liroi nga të gjitha akuzat. Ish-kryeministri i Kosovës dhe kryetar i Aleancës për Ardhmërinë e Kosovës, Ramush Haradinaj, ka ripërsëritur se “ndalimi i tij është krejtësisht politik dhe se pafajësia e tij është vërtetuar dy herë me proçeset gjyqësore ndaj tij të zhvilluara në Tribunalin e Hagës për krime lufte ne ish-Jugosllavi”. Nënshtetësia shqiptare për Ramush Haradinajn, është një vlerësim për vullnetin sakrificat dhe vizionin e drejtuesve të betejave si Ramushi dhe bashkëluftëtarët e tij. Janë pikërisht ata, që përgjatë viteve 1997-99 bënë protestën e madhe shqiptare për liri. Ata u organizuan dhe vepruan, duke patur parasysh traditën luftarake të popullit shqiptar, e të ndërgjegjësuar se kishte një fund. Lëvizja ushtarake në Kosovë, në vetvete ishte krejtësisht e një rryme idealistësh. Pa kontributin e bijve e bijave të atij formacioni luftarak, Kosova sot nuk do të ishte e pavarur dhe as shtet, me orientime të qarta në rrugën e integrimit Euro-Atlantik. Ramush Haradinaj është njeriu i atyre idealeve të mëdha. Ramushi është luftëtari dhe Komandanti i Ushtrisë Çlirimtare të Kosovës, e cila nxori shqiptarët nga letargjia dhe iluzioni se, Liria, nuk mund të fitohej ndryshe përveçse me luftë. Luftëtar dhe Komandant, i asaj Ushtrie e cila, ka luajtur një rol tepër të rëndësishëm për zhvillimin kombëtar, atë rajonal, pse jo dhe global. I asaj Ushtrie, që bëri aktivizimin e gjithë shqiptarëve kudo ishin, në projektin vizional të çlirimit përfundimtar të Kosovës nga Serbia. I asaj Ushtrie, e cila në projektin dhe aktivitetin e saj çlirimtar, rrëzoi mitin sllav për pathyeshmërinë e ushtrisë serbe, ndërkohë nëpërmjet luftës që kreu, u thye dhe miti i kufijve shqiptarë. Lufta çlirimtare ndikoi në rrëzimin e regjimit të Milosheviçit, duke çliruar përfundimisht popullin serb nga ky diktator. Nëpërmjet kësaj lufte, u hoq maska diskriminuese për shqiptarët në Maqedoni, Preshevë, Medvegjë, Bujanovc, e në Malin e Zi. Ajo luftë i dha një rol të madh e pozitiv Shqipërisë në zhvillimet demokratike rajonale e globale. Ka qenë kjo luftë, që çoi në test unitetin e NATO-s, dhe qëndrimet e Bashkimit Europian. Kjo luftë, shmangu dukshëm burokracinë e komplikuar të OKB-së, duke nxjerrë në pah rolin parësor të Shteteve të Bashkuara të Amerikës, si superfuqia e vetme dhe mbrojtëse e vlerave demokratike të njerëzimit. Kontribute të individëve si Ramushi dhe familjeve të tilla si ajo e tij, janë pasuri kombëtare, e si të tilla duhen vlerësuar. Ndaj, shqiptarët me të drejtë “protestojnë” në mbrojtje të kësaj pasurie e kontributi. Mbajtja në kushtet e arrestit e Ramush Haradinajt, nxjerr në pah sesa një shtet si Franca, i ka të përditësuara vendimet e Gjykatës së Hagës, e cila e ka liruar Haradinajn nga të gjitha akuzat, disa vite më parë. Në njëfarë mënyre, kjo është Europa e zhytur në burokraci, e ne si qytetarë të saj të lirë, si shqiptarë të vuajtur, por të ndershëm, “protestojmë” për të vërtetën. Dhe e vërteta do të dalë në dritë shumë shpejtë, ajo është në anën tonë, është me Ramush Haradinajn. Ashtu sikurse, nuk duhet të harrojnë se; Gjatë fushatës së bombardimeve të kryera nga NATO mbi instalimet ushtarake serbe në Serbi dhe Kosovë, Franca ishte shteti që vendosi në dispozicion 20-40 avionë, mes tyre avionë gjuajtës bombardues, avionë për zbulimin e objektivave dhe transmetim të dhënash, avionë për furnizim me karburant në ajër, teksa mbajti në gatishmëri të pandërprerë luftarake Aeroplanmbajtësja “FOCH”. Franca është një prej vendeve të mëdha dhe të rëndësishme të Europës, e cila qysh në krye të herës e ka mbështetur Pavarësinë e Kosovës dhe e ka njohur Kosovën si shtet. Ndërkohë që, presidenti Nishani dekretoi nënshtetësinë shqiptare për çiftin Haradinaj, mediat kryesore serbe kanë reaguar menjëherë. Nënshtetësia shqiptare do të jetë një ndihmesë e madhe për Ramush Haradinajn në proçesin gjyqësor në Francë kundër ekstradimit të tij në Serbi. Kreu i shtetit shqiptar dëshmoi se, ka të drejtë ligjore dhe sipas të gjitha të drejtave ndërkombëtare të përfshihet direkt në kërkesën e paligjshme dhe politike të Serbisë për ekstradimin e Ramush Haradinajt. Kjo do të thotë se Haradinaj ka ndihmesën e plotë të Shqipërisë. Në seancën e radhës, Haradinaj do të paraqitet në gjykatë si qytetar i Shqipërisë, ndërsa akuzat për të janë si shtetas shqiptar i Kosovës, ndërsa Tirana mund të ndërhyjë në këtë çështje në mënyrë që Haradinajt të mos i shkelen të drejtat ndërkombëtare.