Demokracia Studentore peticion kundër trupit gjykues të Apelit

02.12.2017 17:56:27

Organizata “Demokracia Studentore” po vazhdon të kërkojë përjashtimin e trupit gjykues të Gjykatës së Apelit, trupë kjo e cila vendosi që objektit i cili ishte vendosur me dhunë në oborrin e Kampusit të Universitetit të Prishtinës “Hasan Prishtina” t’i takojë rreth 4 hektarë tokë.

Kjo organizatë ka njoftuar se do të organizojë peticion me studentët e Universitetit të Prishtinës për të përjashtuar këtë trupë gjykues, peticion ky i cili do të fillojë javën e ardhshme.

Mexhid Ramusa nga Organizata “Demokracia Studentore” shprehet vendimi që është marrë nga Gjykata e Apelit është vendim që po dëmton rëndë si Universitetin e Prishtinës, ashtu edhe tërë kombin tonë.

“Është e papërceptueshme se si mund t’i jepen 4 hektarë një objekti fetar edhe atë kishës ortodokse serbe që është ndërtuar me dhunë nga forcat serbe. Ky vendim duhet medoemos të shfuqizohet dhe ajo tokë t’i takojë Universitetit.Ne do të vazhdojmë nga java e ardhshme duke filluar me peticion për të kërkuar përjashtimin e trupit gjykues të Gjykatës së Apelit. Ky peticion do të nënshkruhet nga studentët e Universitetit të Prishtinës dhe do të i’a dorëzojmë Këshillit Gjyqësor të Kosovës dhe nëse nuk përjashtohet ky trup gjykues ose nuk shfuqizohet ky vendim ne do t’i përdorim të gjitha format e mundshme deri sa ajo tokë të i’u rikthehet Universitetit të Prishtinës. Nuk mund të pranojmë që objekti i cili është ndërtuar me dhunë nga forcat serbe të jenë funksionale”, ka thënë ai.