Detaje rrëqethëse nga vrasja masive në Kanada, sulmuesi u trokiste në derë viktimave dhe i qëllonte – ua vinte flakën shtëpive të tyre

22.04.2020 12:23:09

Në një zonë të qetë rurale në Nova Scotia në lindje të Kanadasë, në ishullin Atlantica, gjatë vikendit të kaluar ka ndodhur një sulm i armatosur.

Aty u vranë 23 persona, kurse pas disa orëve policia ka arritur ta vrasë sulmuesin, dentistin Gabriel Wortman, 51-vjeç.

Drama filloi të shtunën në orët e vonshme, kurse autoritetet e sigurisë besojnë se mund të ketë më shumë viktima, pasi Wortman për plotë 12 orë ka vrarë njerëz në këtë rajon.

I veshur me uniformë të policisë, ua vinte flakën shtëpive dhe vriste njerëz, kurse një prej viktimave të tij është policja kanadeze Heidi Stevenson, nënë e dy fëmijëve, shkruan Blik.

E përditshmja “Toronto Sun” ka bërë të ditur se Wortman rreth orës 23:30 i kishte trokitur njerëzve nëpër dyer të shtëpive duke u dukur si një zyrtar policor, kështu ata nuk hezitonin ta hapnin derën. Më pas i qëllonte dhe ua vënte flakën shtëpive.

Një nga shtëpitë e djegura është edhe shtëpia e tij. “Toronto Sun” ka botuar një artikull ku thuhet se dy viktimat e para ishin ish-bashkëshortja e tij dhe partneri i saj i ri. E pas masakrës në Portpique, ky vrasës është arratisur me veturën që ngjante shumë me ato të policisë.

E pas 12 orëve ndjekje, policia ka hasur në të në një pompë të derivateve në Irwing, nga ku filloi drama e vërtetë.

“Sot është një ditë e kobshme për Nova Scotian, do ta mbajmë në mend gjatë”, ka deklaruar Lee Bergerman, komandant i policisë kanadeze të Nova Scotia.

Në mesin e viktimave është edhe një pjesëtare e tyre, e cila për 23 vite shërbeu në policinë kanadeze.

Ueb-faqja kanadeze “The Globe and Mail”, shkruan se në mesin e viktimave është edhe mësuesja Lisa McCally dhe çifti bashkëshortor Jamie dhe Greg Bler. Është vrarë edhe infermierja Heder O’Brian, kurse e bija e saj Darsy Dobson ka shkruar në Facebook se një “përbindësh ia ka vrarë të ëmën”.

Kjo nënë për herë të fundit e kishte dërguar një mesazh në grupin e bisedës që e krijoi me familjarët rreth orës 9 e 59, kurse në 10:15 është vrarë.