Donald Trump dhe neonazistët

21.11.2016 13:39:50

Gjatë gjithë fushatës elektorale, organizata të të drejtave të njeriut apo ato që angazhohen për të drejtat e emigrantëve pa leje qëndrimi të rregullt kishin paralajmëruar se fjalimet me gjuhë urrejtjeje të Donald Trumpit mund të çojnë vendin në zgripin e një lufte civile. Tani Donald Trump ka fituar, lufta është hapur. Disa nga përkrahësit e tij festojnë rëndësinë e re që kanë marrë me përshëndetje hitleriane në rrjetet sociale dhe shprehen hapur për pastrime etnike. Organizata si “National Policy Institute” (NPI) –ftojnë plot vetëbesim në konferenca shtypi, për të shpërndarë vetëm disa godina larg Shtëpisë së Bardhë ideologjitë e tyre.

Ideologët që kërkojnë rimarrjen e pushtetit nga të bardhët

Me flokët të rregulluara sipas stilit hitlerian, me një buzëqeshje vesh më vesh ata deklarojnë, se ka ardhur që të Bardhët më në fund të marrin atë që u takon, shprehimisht kontrollin mbi vendin e tyre, Shtetet e Bashkuara, që në fund të të fundit janë themeluar nga europianët. Ata nuk druhen të flasin për rrezikimin e identitetit të bardhë për shkak të shoqërisë multikulturore. Ata pretendojnë, se korrektesa politike dhe shtypi i gënjeshtrave, si thonë ata, janë përgjegjëse që pakicat në këtë vend kanë më shumë trajtim se raca e bardhë. Me zë të lartë ata kërkojnë që të përgjohen të gjithë myslimanët, dhe të krijohen rajone në SHBA, ku lejohen të jetojnë vetëm të bardhët.

Tirada të tilla gjejnë miratim të jashtëzakonshëm në mediat sociale, shifrat e vizitorëve në portalet e internetit janë tejet të larta. Vulgu ka shpërthyer. Një gjë mjaft e rrezikshme për paqen sociale në vend. Në të gjitha kampet politike janë rritur shqetësimet, se protestat e deritanishme paqësore mund të shndërrohen në përleshje. Urrejtja lind urrejtje. E gjithnjë e më shumë njerëz kanë frikë për rrezikimin e jetës dhe të familjeve të tyre. Dhe ata janë të gatshëm të luftojnë për të ardhmen e tyre.

Rreziku që mbart Trump

Përgjegjësinë për këtë e mban Donald Trump. Në të shkuarën ai demonizoi komunitete fetare dhe etni të ndryshme, për të bërë fushatë me frikën e ndezur. Ende pa hyrë në Shtëpinë e Bardhë, ai zgjodhi Steve Bannon si këshilltar strategjik, një njeri, i cili nga të djathtët nacionalistë  ngrihet lart si njeri i tyre, të gjitha këto pa asnjë lloj distancimi nga ekipi i ardhshëm qeveritar. Themeluesi i NPI-s, Richard Spencer e përshkruan vetë rrezikun më të madh: Donald Trump dhe lëvizja  e tij, thotë ai, janë trupi. Ai dhe ideologjia e tij – koka. Koka që i mungon lëvizjes së Trump. Deri më tani thuhej me të drejtë, se Donald Trump nuk është ideolog në kuptimin klasik të fjalës. Atij para së gjithash i intereson vetja, pastaj biznesi. Prandaj tek ai ekziston një hapësirë boshe që mund të zihet nga një ideologji politike, që është më e komplikuar dhe e rezistueshme se premtimi i tij – “Make America great again”.

Nuk ka për të kaluar shumë kohë dhe votuesit e Trump do të zhgënjehen dhe do të kuptojnë se ai zor se do të vërë në jetë ndonjë nga premtimet e tij bombastike. As vende pune nuk do të bien nga qielli, as Meksika nuk ka për të paguar për një mur kufitar. Si rrjedhojë Trump do të ketë nevojë për shpallje fajtorësh, që t’i bëjë ata përgjegjës për dështimet e tij. E nuk është e vështirë të përfytyrosh se kë do të përzgjedhin për këtë rol këshilltari i tij strategjik, Bannon dhe nacionalistët e djathtë: Emigrantët jo europianë dhe myslimanët. Historia mund të përsëritet.