Drama e kidnapimit të 11 vjeçarit në Shtime: Familjes Tafa po i kërkohen 50 mijë euro

08.04.2018 22:25:52
Një 11 vjeçar nga qyteti i Shtimes dyshohet se është kidnapuar. Në orët e mbrëmjes së sotme, ai është marrë nga një makinë derisa familjes për lirimin e tij i janë kërkuar 50 mijë euro.

Xhaxhai i tij, Xhevdet Tafa ka thënë për Gazetën Express se 11 vjeçari po luante me një djalë tjetër të kur është ftuar nga disa persona nga një makinë që po kalonte afër.

Sipas rrëfimit të djalit të axhës, i cili ishte i pranishëm në momentin e rrëmbimit, kur E.T iu afrua makinës, ai u fut brenda me dhunë.

“E kanë thirr në emër disa persona në një veturë, ai është afruar pastaj e kanë marrë tek kerri dhe e kanë futur brenda”, tregon Tafa.

Nga ai moment ata nuk kanë marrë lajme për djalin përveç një mesazhi ku kërcënoheshin me jetën e tij.

“Nëse nuk ban 50 000 euro E… mos e kerko ma”, thuhet në mesazhin që morën.

Tafa, i cili nuk jeton në Kosovë thotë se nuk kanë probleme me askënd.

Rastin e kanë lajmëruar në polici por thonë se nuk kanë dyshime se kush mund të jetë pas rastit.