Është sulmuar fizikisht nga dy të rinj serb, të martën rreth orës 16:00, banori i “Kroit të Vitakut”, Sadat Habib Rama. Ai ishte qëlluar me shkopinj prej druri disa herë në gjoks dhe pjesët tjera të trupit përderisa ka mbetur i alivanosur në rrugë.
Kështu thuhet në një njoftim të dërguar nga Hysni Syla, zëdhënës i Komunës së Mitrovicës.
Sipas njoftimit, viktima Sadat Rama, i cili rastin e ka paraqitur në stacionin verior të policisë, kishte ardhur në komunën e Mitrovicës Jugore për të njoftuar drejtuesit e komunës, me ç’rast edhe është pritur nga nënkryetari Faruk Mujka.
Rama i ka thënë nënkryetarit Mujka, se ngjarja ka ndodhur në hyrje të lagjes veriore “Lugina e Doktorëve”, para ndërtesës së ngritur nga Qeveria e Serbisë për të akomoduar serbët e ardhur nga Kroacia dhe të tjerët, në hyrje të lagjes së lartpërmendur.
“Isha duke u kthyer në shtëpi rrugës që kalon nëpër “Luginën e Doktorëve”, kur papritmas më janë ofruar dy të rinj që flisnin serbisht dhe kanë filluar së pari të shajnë e pastaj të më qëllojnë me shkopinj prej druri nëpër tërë trupin. Më kanë goditur përderisa jam rrëzuar në tokë dhe jam alivanosur, duke mbetur aty për disa minuta i shtrirë, pa më ofruar askush ndihmë”, citohet të ketë thënë ai.
Viktima Rama ka bërë të ditur se ka kërkuar ndihmën e mjekut në QKMF-në në pjesën jugore të qytetit, ku ai ka konstatuar lëndimet serioze trupore.
Sipas njoftimit, incidentin ndëretnik që ka ndodhur pas një kohe bukur të gjatë, e kanë dënuar ashpër kryetari i komunës, Agim Bahtiri dhe nënkryetari, Faruk Mujka.
Kryetari Bahtiri ka kërkuar nga policia e Kosovës dhe organet e hetuesisë që rasti të zbardhet sa më shpejtë dhe që sulmuesit të kapen e të qiten para drejtësisë për të marrë dënimin e merituar.