Presidenti i Kosovës, Hashim Thaçi i ka dhënë medaljen “Urdhri i Lirisë” kryetarit të Kuvendit të Shqipërisë Gramos Ruçi i cili po qëndron në një vizitë dy ditore në Kosovë.
Presidenti i Kosovës tha se ky çmim i jepet Ruçit për kontributin e dhënë për liri dhe pavarësi të Kosovës.
“Pata kënaqësinë si president i Republikës se Kosovës në përputhmëri me ligjet dhe Kushtetutën e Republikës së Kosovës për kontributin dhe angazhimin e jashtëzakonshëm të Kryetarit Ruçi në pavarësinë Kosovës t’i jap dekoratën “Urdhri i Lirisë”, duke vlerësuar lart rolin dhe kontributin në të gjitha legjistraturat në Parlamentin e Shqipërisë për lirinë dhe pavarësinë e Kosovës për kontributin tuaj personal në mbështetje të jashtëzakonshme në kohen e luftës por edhe ne përpjekjet e tranzicionit demokratik në Kosovë dhe të shpallje së Pavarësisë”, tha Thaçi.
Kryetari i Kuvendit të Shqipërisë është shprehur i befasuar me këtë dekoratë që i është dhënë nga shteti i Kosovës në vizitën e tij të parë si kryetar Kuvendi.
“Kjo është dekorata e parë që unë marr nga presidenti I Kosovës, i jam shumë mirënjohës. Kontributi për lirinë e Kosovës nuk i përket asnjë individi, as mua dhe pavarësisht të gjithave… spektrit politik shqiptar, të gjithë deputetëve shqiptarë ka qenë ëndrra e të gjithëve ka qenë që pavarësia e Kosovës të bëhet realitet. Kështu që ky vlerësim që më behët mua sot unë ia atribuoj dhe ia dedikoj bashkatdhetarëve të mi në Shqipëri, pavarësisht se cilit spektër politik i takojnë”, tha Ruçi.
Kryetari i Kuvendit do të takohet edhe me kryeministrin e Kosovës, Ramush Haradinaj.