Kryeministri i Kosovës, Ramush Haradinaj, pas takimit të sotëm me menaxhmentin e KEK-ut, banorët e Shipitullës dhe Hadës tha se takimi kishte të bënte me zhvendosjen e banorëve të këtyre dy fshatrave.
Haradinaj tha se ka disa ditë që ka ngecur shpronësimi dhe puna.
Ai tha se janë disa matrapazë që këtë situatën e zhvendosjes dhe krizën energjetike po duan ta plaçkitin buxhetin e vendit.
Sipas tij, kur të kalojë afati, atëherë do të pasojë zbatimi i ligjit.
“Ka matrapaz edhe tek banorët, edhe në KEK, edhe në ministri, edhe në komunë që po duan të përfitojnë, por sipas tij, nuk do t’i presin shumë dhe nëse banoret nuk e pranojnë ofertën e tij gjeneroze, atëherë bagerat do të shkojnë aty dhe do ta zbatojnë ligjin”, tha ai.
Shefi i ekzekutivit kosovar këtë deklaratë e ka dhënë pas takimit që ka zhvilluar me menaxhmentin e Korporatës Energjetike të Kosovës dhe përfaqësuesit e fshatrave Hade dhe Shipitullë, ku prezent ishte edhe kryetari i komunës, Xhafer Gashi.
Gashi ka deklaruar se shumica e banorëve janë pajtuar tashmë dhe e kanë pranuar ofertën e Haradinajt, por se probleme kanë me Lagjen Mirena, të cilat pret se do të kalohen dhe gjithçka të kryhet shpejt.
