Lideri i ISIS-it, Al Baghdadi u mbajt në burgun irakian të Abu Ghraib, në shkurt të vitit 2004, i cili atë vit u përfol për torturat çnjerëzore që ushtarët amerikanë bënin ndaj të dënuarve. Lajmi është bërë i ditur nga “The Intercept”, i cili citon burime të ushtrisë amerikane.
“Kur ai u burgos, Al Baghadi mbante numrin US9IZ-157911CI, që shërbente për të identifikuar të dënuarit”, shkruan sërish “The Intercept” duke deklaruar se dokumentet e të burgosurit, shefit të xhihadistëve, në mënyrë eksplicite nuk e përmendin burgun Abu Ghraib. Që udhëheqësi i Kalifatit është ndaluar nga forcat amerikane, kjo tashmë dihet mirë, por deri më tani besohej se ai kishte qenë i burgosur në kampin BUCCA, në jug të Irakut.
Gjithashtu ende nuk është e qarte se për sa kohë ai ka qenë i izoluar. Në fillim u fol për një periudhë ndërmjet vitit 2005 -2009, por Pentagoni ka konfirmuar se Al Baghdadi qëndroi në burg vetëm 10 muaj; nga shkurti deri në dhjetor të vitit 2004, kur edhe u lirua.