Hoxhaj takon ambasadorët e Quintit: Treni pjesë e politikës agresive të Serbisë

16.01.2017 15:31:21

Ministri i Punëve të Jashtme të Kosovës, Enver Hoxhaj, ka takuar sot në një drekë pune ambasadorët e Shteteve të Bashkuara të Amerikës, Gjermanisë, Britanisë së Madhe, Francës dhe Italisë, si dhe shefen e Zyrës së BE-së në Kosovë, Nataliya Apostolova dhe shefen e EULEX’it, Alexandra Papadopoulou.

Në këtë takim, ministri Hoxhaj ka thënë se treni propagandues që Serbia ka dashur ta fusë në Kosovë nuk është ngjarje e izoluar por pjesë e një politike agresive dhe të zgjeruar të Serbisë në raport me Kosovën. Por sipas tij, Kosova do t’i përgjigjet kësaj politike të papranueshme.

“Treni nuk është një ngjarje e izoluar, por është pjesë e një politike agresive dhe të zgjeruar të Serbisë në raport me Kosovën, të cilës Kosova do t’i përgjigjet duke mbrojtur sovranitetin dhe integritetin territorial të saj”, ka thënë Hoxhaj.

Sipas Hoxhajt, Serbia ka zgjeruar gamën e provokimeve në raport me Kosovën dhe institucionet e Kosovës janë të shqetësuara për situatën në veri të vendit.

MPJ nëpërmjet një komunikate, qëllimi i këtij takimi ishte informimi i vendeve mbështetëse të Kosovës për provokimet dhe sjelljet destruktive të Serbisë.