Gjykata Themelore në Prishtinë, më 25 shtator të vitit të kaluar, të akuzuarin Jonuzi e kishte shpallur fajtor për veprat penale, vrasje e rëndë dhe armëmbajtje pa leje.
Jonuzi, për vrasjen e vëllait të bashkëshortes së tij, ishte dënuar nga gjykata me 24 vjet burgim, kurse për armëmbajtje pa leje, ishte dënuar me një 1 vit e 6 muaj burgim.
Për këto dy vepra, gjykata e shkallës së parë, të akuzuarin Jonuzi e kishte gjykuar me dënim unik prej 25 vjetësh burgim.
Kundër këtij aktgjykimi, ankesë në Gjykatën e Apelit kishte paraqitur mbrojtësi i të akuzuarit Jonuzi, avokati Naim Aliu.
Në ankesën e avokatit e Aliu, që në pika e shkurtra e lexoj gjykatësi referues Xhevdet Abazi, thuhet se aktgjykimi i shkallës së parë është i përfshirë me shkelje esenciale të dispozitave procedurale, pasi që dispozitivi i aktgjykimit nuk është përpiluar sipas nenit 370 të Kodit të Procedurës Penale.
Gjithashtu, sipas ankesës së avokatit Aliu, gjykata e shkallës së parë nuk ka marr fare parasysh motivet e të akuzuarit për kryerjen e veprës për të cilën akuzohet ashtu siç nuk ka marr parasysh as kërkesat e mbrojtjes për bërjen e një ekspertize mjekësore për të akuzuarin Jonuzi.
Me këtë ekspertizë, mbrojtja pretendon se do të dilej në përfundim, se i akuzuari Jonuzi, vrasjen e ka kryer në gjendje të tronditjes së fortë psikike.
Duke marr parasysh se ky rast ka ndodhur brenda familjes, si dhe i plagosur në ditën kritike ka mbetur edhe vëllai i të akuzuarit, mbrojtja pretendon se dënimi prej 25 vitesh është shumë i rëndë, pasi që e dëmtuar në gjithë këtë rast ka mbetur edhe vet familja e të akuzuarit.
Andaj, për këtë arsye, avokati Naim Aliu ka kërkuar nga kolegji i Apelit që ndaj të mbrojturit të tij të shqiptohet një dënim më i butë.
Ankesë kundër aktgjykimit të shkallës së parë ka bërë edhe mbrojtësi tjetër i të akuzuarit, avokati Gjuran Demaj, mirëpo i njëjti ka kërkuar që rasti të kthehet në rigjykim për shkak të shkeljeve që i njëjti pretendon se ka bërë gjykata e shkallës së parë.
“Ky aktgjykim është marr me shkelje esenciale të dispozitave procedurale. Nuk ka asnjë fakt relevant që vërteton aktgjykimin e themelores. Aktgjykimi është bazuar në prova të hetuesisë e jo në prova që janë nxjerrë gjatë shqyrtimit gjyqësor”, tha në fjalën e tij, avokati Demaj.
Tutje sipas Demajt, provat që janë përshkruar në aktgjykimin e shkallës së parë janë kundërthënëse me njëra tjetrën.
“Edhe nëse vërtetohet fajësia e të mbrojturit tim, në këtë rast, nuk mund të kemi vrasje të rëndë siç është cekur në aktgjykim, por vrasje të kryer në gjendje të tronditjes së thellë psikike, pasi që i akuzuari ka qenë i ofenduar nga ana e tanimë të ndjerit Basri Krasniqi”, shtoi avokati Demaj.
Gjithashtu, sipas mbrojtjes, shkalla e parë me rastin e shqiptimit të dënimit, nuk ka marr parasysh fare rrethanat lehtësuese për të akuzuari, siç janë fakti se i njëjti është prind, është mbajtësi i familjes, nuk ka qenë më parë i dënuar dhe se ka shpreh keqardhje për veprën e kryer.
Duke u bazuar në të gjitha këto shkelje që pretendon mbrojtja se ka bërë shkalla e parë, avokati Demaj, kërkoi që rasti të kthehet në rigjykim.
Në anën tjetër, refuzimin e ankesave të mbrojtjes dhe vërtetimin e aktgjykimit të gjykatës së shkallës së parë si të bazuar, e kërkuan përfaqësuesi i palës së dëmtuar, avokati Hamit Gashi si dhe prokurori i Apelit, Idain Smajli.
Sipas tyre, dënimi i shqiptuar nga ana e Gjykatës Themelore në Prishtinë, është adekuat me veprën e kryer dhe ky aktgjykim nuk është përcjell me shkelje siç pretendon mbrojtja.
Ekrem Junuzi, akuzohet se më 8 mars të vitit 2014, në Prishtinë, për shkak të një mosmarrëveshje që kishte pasur me bashkëshorten e tij, e ka privuar nga jeta vëllain e saj, Bastri Krasniqi.
Sipas aktakuzës, Jonuzi pasi që ka tentuar të gjej zgjidhje për këto mosmarrëveshje me Bastri Krasniqin, vëllain e bashkëshortes në një kafiteri të Prishtinës, ku prezent kanë qenë edhe djali dhe vëllai i të pandehurit dhe derisa të njëjtit ishin duke u kthyer nga kafiteria, më të arritur tek shtëpia e vëllait të Jonuzit, i pandehuri ka dal nga vetura e tij dhe iu ka afruar veturës së djalit të tij ku gjendej Bastri Krasniqi, ka hapur derën e veturës dhe me dashje që ta privoi nga jeta e ka shtënë tre herë me armë zjarri, në drejtim të tashmë të ndjerit, në pjesë të ndryshme të trupit.
Si pasojë e këtyre të shtënave, Krasniqi kishte mbetur i vdekur, derisa një plumb e kishte goditur në këmbë edhe vëllain e tij, Fejzi Jonuzin, të cilit i është shkaktuar lëndim i rëndë trupor.
