Isa Mustafa: Posti i kryeministrit, pengesa e vetme për arritjen e koalicionit me VV-në

30.08.2019 14:20:18

Kryetari i LDK-së, Isa Mustafa e ka pranuar se nuk ka ende asgjë konkrete për arritjen e koalicionit me VV-në.

Ai ka thënë se po punohet që koalicionit të mundësohet, mirëpo e ka konfirmuar se posti i kryeministrit është pengesa kryesore për arritjen e marrëveshjes, shkruan lajmi.net.

“Nuk kemi ndonjë çështje tjetër për të cilët ne nuk jemi pajtuar, por posti i kryeministrit është ai që po e zhagit këtë proces dhe po e pamundëson marrëveshjen. Ne duhet ta kemi timonin për një koalicion qeverisës”, ka thënë ai.

Ashtu siç kishte paralajmëruar edhe kandidatja për kryeministre, Vjosa Osmani, koalicioni me VV-në mund të arrihet edhe pas mbajtjes së zgjedhjeve.

“Në të gjitha bisedat kemi potencuar që nëse tani nuk mund ta bëjmë koalicionin ne duam të lëmë hapësirë për koalicion pas zgjedhjeve. Ne nuk duam partner tjetër pos VV-së, nuk do të bëjmë me askënd tjetër koalicion”, ka përfunduar Mustafa.

E ndonëse sot është dita e fundit kur mund të paraqiten në KQZ koalicionet e mundshme, nuk është paralajmëruar takim i dy liderëve, Kurtit e Mustafës.