Jahjaga: Gruaja është heroina e secilës familje

07.03.2020 13:58:51

Ish-presidentja e Kosovës, Atifete Jahjaga, mbrëmë mori pjesë në organizimin e KEDS-it, ku u nënshkrua “Parimet për Fuqizimin e Gruas”, ku në fjalën e saj të rastit, tha se janë gratë ato që e mbajnë një shoqëri të bashkuar.

Jahjaga  u shpreh se gratë kanë bërë shumë progres në pozita udhëheqëse, ndërsa tha se gruaja është heroina e secilës familje.

“Gruaja është shtylla e shoqërisë, mban komunitet e bashkuara dhe i ushqen ato. Gratë tona u kujdesën për familjet në kohët më të vështira. Gruaja pra është heroina e gjithsecilës familje”,  tha Jahjaga.

Jahjaga bëri thirrje që të shythet përpara legjislatura për barazi gjinore dhe të punohet më shumë në heqjen e barrierave.

“Kemi arritur progres, kemi shumë gra në pozita udhëheqëse, kemi zë më aktiv. Rrota e ndryshimit ka filluar të rrokulliset. Të shtyjmë përpara legjislaturën për barazi gjinore, të punojmë për barabarësinë në tregun e punës dhe heqjen e barrierave. Ne nevojiten më shumë gra në edukim, punësim e pozita udhëheqëse”, porositi Jahjaga.

Gjatë një organizimi të bërë mbrëmë në Prishtinë, drejtorët gjeneralë të KEDS dhe KESCO, kanë nënshkruar Parimet për Fuqizimin e Gruas.

KEDS dhe KESCO kanë bërë edhe hapat e parë konkret në këtë drejtim duke hapur dhomë të posaçme për nënat dhe foshnjat brenda kompanisë, duke vendosur kutitë e raportimit në çdo distrikt si dhe me plane të qarta për krijimin e Zyrës së posaçme për barazi gjinore si dhe organizmin e ligjëratave për punonjësit për barazi gjinore.