Prokuroria Themelore e Prizrenit ka kërkuar 30 ditë paraburgim për të dyshuarin Mentor Shuki, i cili gjatë ditës së djeshme është kapur në posedim të substancave narkotike në Prizren.
Sipas kësaj kërkese, të dyshuarit Shuki i janë gjetur lloje të ndryshme të substancave të cilat dyshohen të jenë narkotik.
“Tek i dyshuari Mentor Shuki është gjetur sasi për të cilën dyshohet se është substancë narkotike dhe atë një shishe qelqi në të cilën gjendej substanca e lëngshme e dyshuar si narkotik të llojit GHB me një peshë rreth 162.97 gram, një shishe qelqi në të cilën gjendej substanca e lëngshme e llojit GHB me një peshë rreth 50.71 gram, katër (4) qese plastike në të cilët gjendej substance pluhur i bardhë e dyshuar për narkotik të llojit “Speed” me peshë prej 3.81 gram si dhe një (1) paketim me qese letre në të cilin gjendej një substance pluhur e llojit “Speed” me peshë prej 0.87 gram e të cilat më pas janë konfiskuar nga ana e Policisë”, thuhet në kërkesën e Prokurorisë së Prizrenit drejtuar Gjykatës së këtushme.
Avokati mbrojtës I të dyshuarit Mentor Shuki, Asdren Bytyqi, tha se nuk janë plotësuar kriteret ligjore për caktimin e masës më të rëndë – atë të paraburgimit dhe po ashtu tha se I mbrojturi i tij e ka pranuar që substanca e gjetur është e tij por ai këtë nuk e ka bërë me qëllim të shitjes dhe shpërndarjes por për plotësimin e nevojave të tij pasi ky I fundit është i varur nga droga.
Para se të fillonte seanca e dëgjimit, mbrojtësi i të dyshuarit Mentor Shuki, avokati Asdren Bytyqi kishte kërkuar përjashtimin e mediave nga salla.
Mirëpo, kërkesa e avokatit është refuzuar nga gjyqtari i procedurës paraprake, Artan Sejrani.
Vendimi pritet të merret gjatë ditës.
