Kryeministri Mustafa premton mbështetje për Gjilanin

13.12.2016 16:16:29

Kryeministri Isa Mustafa, pas takimit që pati me kryetarin e Gjilanit, Lutfi Haziri, kanë vënë gurëthemelin e objektit të Qendrës Kryesore të Mjekësisë Familjare (QKMF) në Gjilan.

Më këtë rast kryeministri Isa Mustafa ka premtuar mbështetje për këtë komunë.

“Me vënien e gurëthemelit për QKMF-në, jemi shumë të lumtur që po përmbyllet cikli i shëndetit primar në këtë komunë. Natyrisht, Gjilani dhe kjo pjesë e Kosovës ka treguar rezultate shumë të mira për kujdesin shëndetësor. Kemi rezultate shumë të mira në zhvillimin ekonomik sepse kemi një ekonomi, e cila është mjaft aktive dhe e mjaft e diversifikuar, e cila dallon nga ajo që kemi arritur në pjesët tjera të vendit”, ka deklaruar kryeministri vendit.

“Do të ketë investime në infrastrukturë dhe mendoj se do ta ndihmoj zhvillimin  ekonomik të Gjilanit. Edhe autostrada e re, e cila do të ndërtohet këtu, edhe lidhjet me Ferizajn dhe Prishtinën, që e shpejtojnë komunikimin ekonomik dhe komunikimin e qytetarëve me pjesë tjera të vendit. Do të mundohemi maksimalisht që t’i bashkërendisimit të gjitha punët me pushtetet lokale edhe me Gjilanin si komunë tepër e rëndësishme për Kosovën”, ka shtuar kryeministri, thuhet në komunikatën e komunës së Gjilanit.

Ndërsa, kryetari i Gjilanit Lutfi Haziri është ka thënë se ky investim përmbyllë ciklin e investimeve të plota në shëndetësinë primare.

“E falënderoj kryeministrin Mustafa për mbështetjen e drejtpërdrejt për Komunën e Gjilanit, në këtë rast për ndërtimin e QKMF-së, e cila përveç ambulantës në Llashicë që do të filloj të ndërtohen vitin e ardhshëm, përmbyllë ciklin e investimeve të plota në shëndetësinë primare. Mund të themi se jemi krenarë me këto arritje. Kryeministrin sot e njoftova edhe për investimet tjera në sektorin publik që kapin shifrën e mbi 5.3 milionë eurove, si mbështetje edhe e qeverisë së Kosovës, pa llogaritur këtu mbështetjen e madhe të donatorëve”, ka deklaruar pas vënies së gurthemelit kreu i Gjilanit, Lutfi Haziri.

Ai ka paralajmëruar se në vitin e ardhshëm po përgatiten për ndërtimin e korridorit Gjilan-Ferizaj dhe Gjilan-Prishtinë, sikurse edhe fillimin e autostradës, e cila është investim i qeverisë së Republikës.

“Në këtë mënyrë, Gjilani integrohet në infrastrukturën kombëtare dhe ndërkombëtare”, tha Haziri.

Ndërtimi i objektit të ri të Qendrës Kryesore të Mjekësisë Familjare kap shifrën e mbi 1.4 milionë euro.