Kryesia e Lidhjes Demokratike të Kosovës në takimin e sotëm e ka lënë të hapur mundësinë që kjo parti të shkojë në koalicion parazgjedhor në me Lëvizjen Vetëvendosje.
Zëdhënësi i Lidhjes Demokratike të Kosovës, Besian Mustafa, pas mbledhjes së Kryesisë së Lidhjes Demokratike të Kosovës, ka thënë se në takimin e sotëm është biseduar lidhur me koalicionet e mundshme parazgjedhore.
Mustafa gjithashtu ka thënë se në këtë mbledhje është biseduar edhe lidhur me emrin e kandidatit të LDK-së për kryeministër, por Kryesia nuk ka dalë me ndonjë propozim konkret.
Ai tha se të hënën sërish do të mblidhet Kryesia dhe do të dalin me propozime konkrete për mandatarin e këtij subjekti politik dhe lidhur me koalicionin e mundshmë me VV-në, e për të cilat do të vendos Këshilli i Përgjithshëm i LDK-së.
Mustafa nuk ka dashur të komentojë mos pjesëmarrjen në mbledhjen e Kryesisë së dy nënkryetarëve të deritashëm, Agim Veliut dhe Lutfi Hazirit.
Ndërkohë ne mbledhjen e sotme, Arban Abrashi është caktuar Sekretar Organizativ i LDK-së.
