Regjistrimet për Lotarinë DV-2018 do të fillojnë më 4 tetor 2016, ora 18:00, me orën lokale të Shqipërisë dhe do të mbyllen më 7 nëntor 2016, ora 18:00, me orën lokale e Shqipërisë.
Ambasada amerikane në Tiranë informoi sot se udhëzimet për Lotarinë DV-2018 janë publikuar në faqen zyrtare të saj. Po ashtu, ambasada paralajmëron aplikuesit e interesuar që të mos përdorin fotografinë e vitit të kaluar në DV-2017 dhe të heqin syzet kur të dalin në fotografi për lotarinë, pasi në të kundërt do të skualifikohen automatikisht.
Nga data 4 tetor deri në datën 7 nëntor, të interesuarit për DV-2018 mund të aplikojnë tek dvlottery.state.gov.
Ndërkohë ambasada amerikane njofton edhe gjithë të përzgjedhurit për intervistë, që kanë fituar lotarin DV-2017, që të dёrgojnë dokumentet nё Seksionin Konsullor mbi dy javë përpara datës së tyre tё takimit.
“Nёse ju nuk e keni marrё akoma garancinë financiare dhe taksat nga sponsori nё SHBA, ju mund t’i sillni ato sё bashku me vizitën mjekësore nё ditën e intervistës. Dështimi për të siguruar qoftë edhe një nga dokumentet e kërkuara do të rezultojë në moskryerjen e intervistës nё ditën e caktuar dhe vonesa tё gjata”, njofton ambasada.
