Meta takon raporterët e KE: Reforma në drejtësi të mos vonohet

29.10.2016 12:37:07

Kreu i Kuvendit Ilir Meta është takuar me bashkëraporterët e Komisionit të Monitorimit të Asamblesë Parlamentare të Këshillit të Europës, Andrej Hunko dhe Joseph O’Reilly.

Z. Meta theksoi faktin se vendi ka nevojë për progres në kryerjen e reformës zgjedhore në kohë, dhe sipas rekomandimeve të OSBE/ODIHR-it. Sipas tij, të gjitha palët duhet të reflektojnë një angazhim më të përgjegjshëm politik me qëllim garantimin e standardeve bashkëkohore, legjitimitetit dhe besueshmërisë së procesit kyç të zgjedhjeve të ardhshme.

Duke vlerësuar punën e raporterëve dhe mbështetjen për Parlamentin shqiptar, Meta tha se duhet punuar më tej për implementimin pa vonesa të reformës në drejtësi dhe në këtë kuadër fokusi duhet përqendruar në krijimin e një klime sa më bashkëpunuese dhe konsensuale politike në funksion të avancimit me axhendën e reformave kyçe për integrimin evropian të Shqipërisë.