Reshjet e borës gjatë natës mes të shtunës dhe të dielës në Kosovë kanë bërë që të vështirësohet qarkullimi nëpër disa rrugë magjistrale dhe rajonale të vendit tonë.
Ministria e Infrastrukturës thotë se gjendja në rrugë është kryesisht e mirë, me përjashtim të rrugëve malore.
Zëvendësministri i Infrastrukturës, Rexhep Kadriu, për Telegrafin ka konfirmuar se gjendja e rrugëve në nivel vendi është e mirë dhe janë të qarkullueshme.
“Të gjitha kompanitë e kontraktuara në Ministria e Infrastrukturës janë të angazhuara në hedhjen e kripës dhe pastrimin e borës. Gjendja e rrugëve momentalisht në nivel vendi është e mirë, të gjitha rrugët janë të qarkullueshme”, tha për Telegrafin, Kadriu.
Ai ka shtuar se në pjesët malore të vendit ka vështirësi në qarkullim të komunikacionit.
“Në pjesët malore komunikacioni po zhvillohet me vështirësi, mirëpo rrugët janë të kalueshme edhe aty. Në Prevallë, në Rugovë dhe në Bajgorë, këto tri vende i kemi ku komunikacioni po zhvillohet me vështirësi, por në nivel të Kosovës rrugët janë të kalueshme”, ka shtuar ai.
