Ministria e Punëve të Jashtme e Kosovës ka thënë se lajmi se një kosovar ka vdekur në kufirin mes Hungarisë e Serbisë nuk është i konfirmuar zyrtarisht.
“Ambasada jonë në Hungari përmes rrugëve zyrtare ka komunikuar me autoritetet kufitare dhe një informacion i tillë është mohuar të paktën sipas tyre nuk ka ndodhur në anën hungareze të kufirit. Zyra Ndërlidhëse e Kosovës në Beograd është duke komunikuar edhe me palën serbe për të marrë informacione nëse ngjarja është e vërtetë apo jo”, thuhet në komunikatën e dërguar nga Ministria e Punëve të Jashtme.
Në komunikatë poashtu thuhet se “komunikimi me autoritetet serbe është vështirësuar edhe për shkak të kolonave të gjata që kanë ndodhur në pikat kufitare të këtij shteti nga ana e Kroacisë dhe Hungarisë”.
Ministria e Punëve të Jashtme poashtu ka ftuar bashkëqytetarët që të shfrytëzojnë pika kufitare tjera dhe rrugë alternative pasi ka një numër të madhë të vizitorëve nga shumë shtete të rajonit që po i shfrytëzojnë rrugët nëpër Serbi për t’u kthyer në vendet e tyre për festat e fundvitit.
