Në një postim në facebook, z. Mustafa i është rikthyer çështjes së liberalizimit të vizave, përkatësisht demarkacionit me Malin e Zi.
Pasi përmend katër dokumentet mbi demarkacionin: Marrëveshjen, Raportin e Komisionit Ndërkombëtar të emëruar nga presidentja Jahjaga, konfirmimin e Departamentit Amerikan të Shtetit dhe Raportin e Komisionit për Matjen e Territorit, z.Mustafa fton që të miratohen këto dhe të hapet rrugë për liberalizimin e vizave.
Ky është postimi i z. Mustafa:
1. E kanë Marrëveshjen e dy komisioneve shtetërore, të Kosovës dhe të Malit të Zi;
2. E kanë Raportin e Komisionit Ndërkombëtar të emëruar nga Presidentja Jahjaga
3. E kanë konfirmimin e Departamentit të Shtetit të Shteteve të Bashkuara të Amerikës, se me marrëveshjen e 25 Gushtit 2015 nuk humb territor as Kosova dhe as Mali i Zi, dhe se SHBA e përkrahë këtë marrëveshje;
4. E kanë Raportin e Komisionit Profesional për Matjen e Territorit të Kosovës, në krye me Kryetarin e Akademisë së Shkencave dhe Arteve të Kosovës, i cili Raport konfirmon se me këtë demarkacion Kosova nuk ka humbur asnjë metër katror territor.
I kanë edhe kauzat politike, me të cilat kanë bërë fushatë të dhunshme. Dhe le të zgjedhin. Ose le të aprovojnë dhe amnistojnë kauzat e tyre të rrejshme politike, ose le të aprovojnë këto katër argument të rëndësishme vendore dhe ndërkombëtare, le të hapin rrugën për liberalizim të vizave.
