Kryeministri i Kosovës, Isa Mustafa ka thënë se me sponzorizim të AAK-së, Kuvendi pati nxjerrë Rezolutë për caktimin e kufijve në bazë të Kushtetutës së vitit 1974.
Ai ka thënë se shpreson që deputetët e AAK-së ta kenë lexuar Kushtetutën e Krahinës Socialiste Autonome të Kosovës, që siç citon Mustafa, thuhet se “Territorin e Krahinës Socialiste Autonome të Kosovës e përbëjnë territoret e komunave të tanishme”.
Sipas kësaj, del që është trashëguar se territori i Kosovës përfshin 22 komuna, dhe sipas vjetarit të vitit 1980, Kosova kishte sipërfaqe 10 mijë e 908 kilometër katrorë, kurse Peja kishte 603 kilometër katrorë, sa ka edhe sot, transmeton Indeksonline.
Më poshtë lexoni statusin e plotë të Mustafës:
Me sponzorizim të AAK-së, Kuvendi ka nxjerrë Rezolutë për caktimin e kufijve në bazë të Kushtetutës së vitit 1974.
Shpresoj se deputetët e AAK-së do ta kenë lexuar Kushtetutën e Krahinës Socialiste Autonome të Kosovës, e cila në Pjesën e parë, Dispozitat e Përgjithshme, neni 3 thotë si vijon: “Territorin e Krahinës Socialiste Autonome të Kosovës e përbëjnë territoret e komunave të tanishme”…. Pra rezulton qartë se ajo që neve kemi trashëguar sipas kësaj Kushtetute si territor të Kosovës ka qenë territori i 22 komunave, sa kishte atëherë Kosova. Në qoftë se mblidhet territori me numra të rrumbullakuar, sipas Vjetarit statistikor 1980, fq.440 rezulton se spërfaqja ishte 10908 km katror, kurse Komuna e Pejës kishte 603 km katror, sa ka edhe sot.
Si Kryeministër i Vendit dhe si Kryetar i LDK-së do të bëjë çdo gjë që të komunikoj me qytetarët e mi dhe të sqaroj çdo të dhënë me të cilën disponoj, jo vetëm si bartës i këtyre pozitave por edhe si profesor dhe akademik, për të mos lënë hapësirë që Kosova të humb asnjë metër katror nga ajo që me Deklaratën e Pavarësisë jemi zotuar për territorin e Republikës së Kosovës.
