Delegacioni i Kuvendit të Kosovës ka zhvilluar takime të ndryshme në Parlamentin e Gjermanisë, përkatësisht me Bundestag dhe Bundesrat. Me këtë rast ata kanë kërkuar nga deputetë të parlamentit gjerman që të mbështesin procesin e integrimit evropian të Kosovës, në veçanti procesin e liberalizimit të vizave me qëllim të lëvizjes së lirë të qytetarëve të Kosovës.
Një delegacion i Kuvendit të Kosovës, përkatësisht anëtarë të Komisionit për Integrime Evropiane ndodhen për një vizitë zyrtare në Berlin.
Vizita e delegacionit e udhëhequr nga kryetarja e Komisionit për Integrim Evropian, Njomza Emini, dhe anëtarët: Valdete Bajrami, Slobodan Petroviq, Bislim Zogaj, Fatmir Xhelili, Vjosa Osmani, Arben Gashi, Donika Kadaj-Bujupi, Time Kadriaj, dhe Kujtim Paçaku, kanë zhvilluar takime të ndryshme në Parlamentin e Gjermanisë, përkatësisht me Bundestag dhe Bundesrat.
Emini, së bashku me anëtarët e tjerë të Komisionit, kanë kërkuar nga deputetë të Parlamentit gjerman që të mbështesin procesin e integrimit evropian të Kosovës, në veçanti procesin e liberalizimit të vizave me qëllim të lëvizjes së lirë të qytetarëve të Kosovës.
Po ashtu, gjatë këtyre takimeve është kërkuar mbështetja për anëtarësimin e Kosovës në shumë organizata të ndryshme ndërkombëtare dhe rajonale.
Me këtë rast, Albani është shprehur i gatshëm për mbështetjen e Kosovës në procesin e anëtarësimit në BE dhe për forcimin e bashkëpunimit të mëtutjeshëm në mes të dy vendeve.
Gjithashtu, delegacioni është takuar me Matthias Luttenberg, zëvendësshef i Divizionit 212 – për Evropë Qendrore, Juglindore dhe Lindore, Kaukaz Jugor dhe Azi Qendrore, në Zyrën Federale të Kancelares.
Në këtë takim është diskutuar për shumë çështje të rëndësishme që ndërlidhen me liberalizimin e vizave (përmbushjen e kritereve siç është demarkacioni dhe luftimi i krimit të organizuar dhe korrupsionit), dialogu me Serbinë dhe zbatimi i marrëveshjeve të arritura, lobimin tek pesë shtetet anëtare të BE-së që ende nuk e kanë pranuar pavarësinë e Kosovës.
Luttenberg ka diskutuar me anëtarët e këtij delegacioni për të gjitha çështjet që ndërlidhen me procesin e integrimit evropian për Kosovën.
Ky delegacioni i Kuvendit, po ashtu ka vizituar Ambasadën e Republikës së Kosovës në Berlin. Vizita zyrtare dy ditore në Berlin është mbështetur nga qeveria gjermane përmes Projektit të GIZ-it gjerman në Kosovë “Mbështetje për Procesin e Integrimit Evropian”
