Në shekullin 21 tetovarët debatojnë ende për deponi të egër

03.08.2016 08:50:03

Organizatori i protestës së fundit në qytetin e Tetovës, Artan Etemi, në emisionin “Click Plus” në TV21 shpjegoi arsyet e protestës, por edhe si është të jetosh çdo ditë në afërsi të deponisë në hyrje të Tetovës. Ata kërkojnë nga komuna që të dislokohet përfundimisht kjo deponi, kurse ndjehen të irrituar se si është e mundur kur në Shkup bisedohet se qendra tregtare a do të jetë në stilin barok apo klasik, në Tetovë të bisedohet për deponi.

“Në Komunën Qendër diskutohet për qendrën tregtare se a do të jetë në stil barok, klasik, apo në ndonjë stil tjetër. Do të doja të jem pjesë e një debati ku temë e diskutimit do të kur do të bisedohej për këtë parcelë ku hedhën mbeturinat që të jetë ndonjë park i gjelbër apo do të ishte ndonjë fushë sportive, apo ndonjë qendër rekreacioni, por fatkeqësisht neglizhenca e komunës së Tetovës, duke mos anashkaluar edhe institucionet tjera siç është ministria e ekologjisë, na kanë sjellë në këtë hall”, tha Artan Etemi.

Profesori Jusuf Mustafai, i cili jeton në lagjen Dardania, rikujton administratën aktuale që zgjedhjet do të vijnë shumë shpejt. Ai thotë se problemi me ndotjen nuk ka të bëjë me politikën, por me tetovarët. Mustafai thotë se është turp që qyteti i dy universiteteve të debatojë për deponi.

 

“Do të kisha dashur të apeloj te administrata aktuale, zgjedhjet vinë shpejt. Të gjithë ata që vinë pas, një herë e përgjithmonë këtë problem ta zgjidhin, është turp Tetova e dy universiteteve me problem deponie. Është me të vërtetë nënçmim për të gjithë qytetarët e Tetovës, jo për votuesit e një partie, apo një partie tjetër”, tha profesor Jusuf Mustafai.