Skulptori Sinan Aliaj është i kënaqur me realizimin e shtatores së heroit Gjergj Kastrioti-Skënderbeu e cila u vendos në Prizren më 28 nëntor.
Në një lidhje direkte në T7, Aliaj ka thënë se duhet para se skulptura të largohet të verifikohet kualiteti i saj nga ekspertët e fushës.
“Para se me pas vendim me largu, mirë me ardh ekspertët e kësaj pune, të bëjnë përcaktimin detalisht, të vijnë të japin një përfundim. Para se me marrë një vendim të gabuar, kështu e kam përshtypjen”, thotë ai.
Madje, Aliaj shton se si dukej heroi kombëtar Skënderbeu nuk e ka ditur askush.
“Nuk e di që dikush ia ka pre kërthizën Skenderbeut, e i ka këndu ninulla, as nuk e ka njoftë Naimi as Fan Noli. Unë e kam nxjerrë një Skënderbe tjetër, ashtu si mu mu ka dok që është dok Skenderbeu”, thotë ai.
Aliaj në vazhdimësi ka bërë thirrje që skulptura të shihet nga afër.
“Jemi duke folur për një vepër arti të dedikuar heroit kombëtar. Janë mësu njerëzit me pa atë heroin që janë mësu me pa që kanë mësu në shkolla e janë vendos buste. Unë jam shumë i sigurt, kushdo që ta sheh afërt e dinë”, shtoi i njëjti.
