Nis zbatimi i vendimit të BQK-së, shtrenjtohen sigurimet e automjeteve për 26%

15.11.2019 16:04:18

Vendimi i Bankës Qendrore të Kosovës (BQK) për shtrenjtimin e sigurimit të automjeteve për 26%, ka nisur të zbatohet nga sot prej kompanive të sigurimeve.

Drejtuesit e automjeteve nga dita e sotme janë të obliguar që të paguajnë sigurimin për 26 përqind më shtrenjtë.

Primi për sigurimin e veturës 1.8 (centimetër kub) që ka qenë 130 euro, tani prej sot është 164,62 euro ose 34.62 euro më shumë se që ishte deri dje.

Burime nga BQK, i kanë thënë KosovaPress-it se vendimi për shtrenjtimin e sigurimeve ka hyrë në fuqi sot.

“Vendimi i marrë më 1 nëntor nga BQK i është dërguar kompanive të sigurimeve dhe ka hyrë në fuqi nga sot për rishikimin e tarifave të sigurimit për kategoritë e automjeteve për pasagjerë”, thotë ky burim.

Derisa, drejtues të kompanive të sigurimit nuk janë deklaruar.

Ndaj këtij vendimi për shtrenjtimin e sigurimeve, janë shprehur të shqetësuar edhe drejtues të Odës së Afarizmit të Kosovës, të cilët konsiderojnë se rritja e tarifave në regjistrimin e makinave për 26% me arsyetimin e falimentimit të një kompanie sigurimi nuk është arsyetim. Sipas tyre, BQK nuk duhet t’i vihet në barrë biznesit dhe qytetarëve.

Ndërsa, për të shtunën, më 23 nëntor janë paralajmëruar dy protesta kundër rritjes së çmimit për sigurimin e automjeteve në Prishtinë.

Madje, njëri prej tyre ishte paraparë të mbahej nesër më 16 nëntor por për shkak të ndeshjes Kosovë-Angli, policia nuk ka lejuar të protesohet tek BQK e cila gjendet në afërsi të stadiumit “Fadil Vokrri”.

Ndryshe, BQK-ja më 1 nëntor kishte marrë vendim që tarifat e sigurimit për kategoritë e automjeteve për pasagjerë të rriten për 26 përqind.