Pacolli në Daka kërkon mbështetje për anëtarësim në INTERPOL

06.05.2018 19:15:57

Ministri i Jashtëm i Kosovës, Behgjet Pacolli, po merr pjesë në Konferencën e Organizatës për Bashkëpunim Islamik, në Daka, Bangladesh.

Ai në këtë konferencë ka mbajtur edhe takime me zyrtarë të shteteve të ndryshme duke folur kështu rreth anëtarësimit të Kosovës në INTERPOL, transmeton “Zeri.info”.

Komunikata e plotë e MPJ-së:

Hapje misionesh të reja diplomatike në vende të rëndësishme dhe me ndikim në pellgje të rëndësishme gjeografike, lobim për Interpol dhe  njohje të reja- temat e takimeve të z. Pacollit. Ai, adresoi dhe konferencën me një fjalim në emër të Republikës së Kosovës

Daka 6 Maj, 2018 – Vijoi dhe sot aktiviteti i ngjeshur diplomatik i zëvendëskryeministrit të parë dhe shefit të diplomacisë së Kosovës, z. Behgjet Pacolli, në Daka, Bangladesh, në kuadër të ministerialit të kryediplomatëve të Organizatës për Bashkëpunim Islamik.

Ai, u takua edhe njëherë me Kryeministren e Bangladeshit znj. Sheikh Hasina dhe me zonjën Chrystia Freeland, Ministren e Punëve te jashtme të Kanadës ku u bisedua për disa iniciativa të përbashkëta për Kosovën.

Ministri i jashtëm i Kosovës, Behgjet Pacolli, u takua dhe me Sekretarin e Përgjithshëm të OBI-it, Yousef bin Ahmad Al-Othaimeen. Ministri Pacolli kërkoi që Kosova të marrë statusin e vëzhguesit brenda kësaj Organizate, me synim që t’i shërbejë paqes, dhe të zhvillojë marrëdhënie miqësore me këtë pjesë të rëndësishme të botës.

Sekretari i përgjithshëm Othaimeen premtoi se mbledhja e ardhshme do ta shqyrtojë si rast të veçantë statusin e Kosovës, ndonëse në Kartën themeluese të OBI, pjesëtarët e OBI-t duhet të jenë dhe anëtarë të OKB-së.

Po ashtu, në ditën e dytë të punimeve, shefi i diplomacisë kosovare u takua me zëvendësministrin e  punëve të jashtme të Egjiptit. Në takim u diskutua për marrëdhëniet historike mes dy vendeve dhe kërkesën e Kosovës për vendosjen e marrëdhënieve diplomatike mes dy vendeve.

“Kosova është gati të hapë ambasadën e saj në Kairo”, tha ministri Pacolli. Kërkesa e tij u vlerësua nga bashkëbiseduesi, i cili shprehu gatishmërinë për të konsideruar forcimin e mëtejshëm të marrëdhënieve mes dy vendeve.

Po sot, Ministri i jashtëm  adresoi forumin e përbërë nga dhjetra ministra të jashtëm të organizatës së dytë ndërkombëtare më të madhe në botë, pas OKB-së, me 56 anëtarë dhe numër të madh shtetesh vëzhgues. Në fillim të fjalës së tij, z. Pacolli falënderoi mikpritësit, institucionet e Bangladeshit, vend që e ka njohur Kosovën, veçanërisht për solidaritetin ndaj popullsisë Rohinga, që po i nënshtrohet kohëve të fundit njëlloj spastrimi etnik ”dukurie që ne si popull e kemi provuar gjatë konfliktitt të 1999”. Ministri i jashtëm kosovar i kërkoi 20 vendeve anëtare jo njohëse të Organizatës së Bashkëpunimit Islamik ta njohin Kosovën, krahas 36 shteteve,  që e kanë bërë këtë hap gjatë dhjetë viteve.

Duke ilustruar përparimin e bërë nga Kosova prej pavarësisë e këtej, në shtet ndërtim, në zhvillimin ekonomik, etj, shefi i diplomacisë kosovare tha se vendi mbetet i angazhuar për rrugën europiane dhe po përparon në marrëdhëniet me Bashkimin Europian, si projekti më i sigurt. Ai, tha se Kosova është përkushtuar gjithashtu, në mbylljen e kapitullit të negociatave me Serbinë, që do të kulmojë me një Marrëveshje paqeje.

Ministri i jashtëm, Behgjet Pacolli, i bëri thirrje vendeve anëtare ta mbështesin Kosovën në anëtarësimin në Interpol, si shërbim për luftën e përbashkët ndaj krimit të organizuar dhe dukurive të tjera që kërcënojnë rendin publik, etj.

Ministri i jashtëm i Kosovës, u takua gjithashtu me Ministrin e Shtetit të Kamerunit Adoum Gargoum, me Ministrin e Shtetit për Punë të Jashtme të Ugandës Philemon Mateke, me zëvendësministrin e  Jashtëm  të Venezuelës Felix Gonzalez, ministrin e Shtetit të EBA-s, Anëar Gargash, me kryetaren e Komisionit për Punë të Jashtme në Parlamentin e Bangladeshit, Dipu Moni, ish-ministre e jashtme e Bangladeshit.

Ai, u takua, gjithashtu edhe me kryesues delegacionesh të Sudanit, Irakut, Malit, etj.

Image

Image

Image

Image

 

 

Image

Image

Image