Sekretari Kardinal i Shtetit të Vatikanit, Pietro Parolin, në emër të Papa Françeskut, ka dërguar një telegram ngushëllimi për viktimat e tërmetit të së martës në Shqipëri.
Në telegramin drejtuar presidentit Ilir Meta, Kardinali Parolin thotë se ‘Ati i Shenjtë po lutet për shpirtrat e atyre që vdiqën në katastrofë’.
Papa Françesku po lutet gjithashtu për “personelin e ekipeve të emergjencës në përpjekjet e tyre të ndihmës”.
“Dëshiroj t’i dërgoj përshëndetjen dhe afërsinë time popullit shqiptar që ka vuajtur aq shumë këto ditë. Shqipëria ka qenë vendi i parë i Evropës që kam dashur të vizitoj. Jam afër viktimave, lutem për të vdekurit, për të plagosurit dhe për familjet. Zoti bekoftë këtë popull që e dua aq shumë”, thuhet në letrën e ngushëllimit.
