Trajneri serb Sinisa Mihajlovic duket të jetë i pamposhtur, pasi ka mposhtur edhe Coronavirus.
“Në dritën e rezultatit negativ të dy tamponëve të fundit për zbulimin e Covid-19, të kryer sipas procedurës, trajneri i Bologna, Sinisa Mihajlovic, mund të rifillojë aktivitetin e tij të rregullt.
Të martën, pra, ai do të jetë në qendrën teknike për të drejtuar stërvitjen e ekipit”, – thuhet në njoftimin përkatës të klubit të Serie A.
Më 23 gusht dhamë lajmin për pozitivitetin e Sinisa Mihajlovic. Trajneri serb ka fituar kështu një betejë tjetër personale, pas asaj kundër leucemisë, që e pati larguar atë nga fushat e futbollit vitin e kaluar.
Një luftëtar i vërtetë, sikurse ka qenë edhe në fushat e blerta, si futbollist. Tani gjithçka është në rregull dhe Mihajlovic do të jetë në gjendje të kthehet për të udhëhequr Bologna e tij në një moment kaq delikat, rreth 10 ditë para fillimit të sezonit të ri.