Përparim Kryeziu emërohet zëdhënës i Lëvizjes Vetëvendosje

22.06.2020 15:44:02

Që nga kjo e hënë, ish-zëdhënësi i Qeverisë Kurti, Përparim Kryeziu ka marrë detyrën e re përsëri si zëdhënës, por tashmë në partinë prej nga vjen, Lëvizjen Vetëvendosje.

Kështu është bërë e ditur përmes një komunikatë për medie nga Lëvizja Vetëvendosje, ku është shkruar edhe një biografi e shkurtë e Kryeziut.

Sipas komunikatës, Kryeziu ka diplomuar me nderime të larta nga Universiteti i Ri i Lisbonës (Universidade NOVA de Lisboa), ku ka studiuar Sociologji Ekonomike dhe e Organizatës.

Postimi i plotë:

Përparim Kryeziu merr detyrën e zëdhënësit të Lëvizjes VETËVENDOSJE!

Përparim Kryeziu është i diplomuar me nderime të larta nga Universiteti i Ri i Lisbonës (Universidade NOVA de Lisboa), ku ka studiuar Sociologji Ekonomike dhe e Organizatës. Ai ishte bursist i programit SIGMA Agile. Studimet bachelor në Sociologji i përfundoi në Universitetin e Prishtinës “Hasan Prishtina”, prej të cilave vitin e fundit të tyre e ka ndjekur në Universitetin e Antwerp-it (Universitetit Antwerpen) në Belgjikë duke qenë përfitues i bursës JoinEU-SEE. Të dy këto bursa të financuara nga Komisioni i Bashkimit Evropian.

Përparim Kryeziu gjithashtu ka qenë bursist pionier i programit të shkëmbimit YES (Youth Exchange and Study) të financuar nga Departamenti i Shtetit Amerikan, nëpërmjet të cilit vitin ka ndjekur një vit të shkollës së mesme në Vermont të Shteteve të Bashkuara të Amerikës.

Për gati tre vjet ka qenë anëtar i shoqërisë civile. Në dy vitet e fundit ka qenë pjesëmarrës aktiv në diskutime publike mbi Dialogun Kosovë-Serbi nëpërmjet punimeve dhe analizave të shkruara dhe kontributit në debate televizive.

Së fundmi, Përparimi ishte zëdhënës i Qeverisë Kurti, ndërsa tani do e ushtrojë detyrën e zëdhënësit në Lëvizjen VETËVENDOSJE!. I urojmë Përparimit punë të palodhshme në rrugëtimin e tij, bashkë me ne, në Lëvizjen VETËVENDOSJE!.