Një person ka raportuar se derisa ishte duke kërkuar ndihmë mjekësore për nënën e tij në shtëpinë e shëndetit në Podujevë, është sulmuar verbalisht dhe fizikisht.
Rasti është i së martës, ku një shërbyes civil i Komunës së Podujevës e ka denoncuar në Policinë e Kosovës, kryetarin e kësaj komune Shpejtim Bulliqi për dhunë fizike dhe verbale ndaj tij gjatë kohës sa ishte në ambulancë.
Sipas raportit të policisë, ngjarja ka ndodhur të martën rreth orës 09:35 në rrugën “19 Qershori”, në Podujevë.
Siç thuhet në raport, viktima ka pranuar tretman mjekësor, ndërsa rasti është duke u hetuar.
“Viktima mashkull kosovar ka njoftuar se derisa ishte duke kërkuar ndihmë mjekësore për nënën e tij në shtëpinë e shëndetit në Podujevë, nga i dyshuari mashkull kosovar dyshohet se është sulmuar verbalisht dhe fizikisht. Viktima ka pranuar tretman mjekësor, ndërsa rasti është duke u hetuar”, thuhet në raport.
