Ronaldo padit gazetën gjermane “Der Shpigel”

29.09.2018 23:30:06

Kristiano Ronaldo ka denoncuar gazetën gjermane “Der Shpigel” mbi një reportazh që akuzon futbollistin portugez për përdhunim, ngjarje të cilën pretendohet se ka ndodhur në vitin 2009, por është pasuruar me detaje vetëm ditët e fundit.

Pas vitesh të tëra heshtje, Ketrin Majonga vendosi të kontaktojë gazetarët gjermanë për t’u bërë të ditur detajet e natës së 12 Qershorit 2009 në një hotel të Las Vegasit, ku asokohe lojtari i Juventus ndodhej me pushime. Vajza amerikane e cila sot është 34 vjeç, shpjegoi se agresioni seksual ndaj saj kishte ndodhur në të njëjtën mbrëmje që ajo njohu Cristiano Ronaldon për herë të parë.

Cristiano Ronaldo pagoi 375 mijë Dollarë për heshtjen e vajzës por tani Ketrin Majonga vendosi të zbulojë versionin e saj të ngjarjes. Përmes avokatit të saj, ajo depozitoi një padi në gjykatën e Nevadas për të zhvlerësuar transaksionin financiar, që kishte shërbyer për ti mbyllur gojën. Për këtë publikim të ngjarjes, Ronaldo vendosi të denoncojë gazetën Der Shpigel.

Portugezi akuzohet për një agresion në verën që shënjoi kalimin e bujshëm nga Mancester Junaitid te Real Madrid, e si për ironi të fatit, kjo çështje rikthehet në skenë në vitin e kalimit tjetër të bujshëm, nga galaktikë te Juventus.