Rrapi i Marashit në Prizren, druri që sipas gojëdhënave është mbjellë në mënyrë hyjnore (Video)

20.09.2018 19:16:26

Në lagjen Marash ndodhet rrapi 500 vjeçar, për të cilin thurën gojëdhëna të ndryshme.

Hija e këtij druri dhe freskia që ofron ai, bën që shumë njerëz të vizitojnë atë.

Banorët rrëfejnë për historinë e këtij druri të vjetër.

Zijadin Azizi i cili ka 97 vite jetë, rrëfen se ai e mban mend drurin që nga mosha shtatë vjeçare.

“7 vjeçar kur kamë qenë na ka sjellë shkolla këtu. Unë e mbaj në mend që 90 vite, dhe çdo ditë vijë këtu për shkak të ajrit të pastër”, thotë për RTV Dukagjinin Zijadin Azizi.

Rrapi i Marashit mendohet se i përket shekullit XIV-XV dhe ai është bërë strehë për shumë lloje të shpendëve.

“Është i veçantë sepse mendohet se është ndër drunjtë më të vjetër në trojet shqiptare. Rrapi nuk është i mbjellë në mënyrë të zakonshme siç mbillen fidanët. Maja e tij edhe dimrit edhe verës qëndron e zezë dhe nuk gjethon. Prandaj kjo është një dëshmi se ky dru nuk është i mbjellë në mënyrë njerëzore por hyjnore”, shprehet Gufran Shehu, që mendohet se është pasardhës i këtij druri.

Një qytetar nga Prizreni thotë se ka takuar shumë turistë të huaj që çuditen me këtë druri.

“Vijë shpesh këtu, është vend i mirë. Nga të gjitha shtetet e Evropës vijnë dhe e vizitojnë. Si ky rrap nuk është asnjë, është i veçantë nga të gjithë”, shprehet qytetari.