Prej më shumë se 24-orësh vijon protesta e qytetarëve para Drejtorisë së Policisë në Tiranë. Ata kërkojnë lirimin e 23 personave të arrestuar për protestën e zhvilluar në Rrugën e Kombit.
Mësohet se protestës së qytetarëve i janë bashkuar edhe deputetë demokratë. Policia ka zhvendosur protestuesit nga trotuari në rrugë, duke u bërë shkak për bllokimin e qarkullimit normal të makinave. Fillimisht protestuesit qëndruan në trotuar, por policia ka kërkuar zhvendosjen, me justifikimin se bllokojnë kalimin e qytetarëve të tjerë.
Nga ana tjetër, institucioni i Avokatit të Popullit ka zhvilluar gjatë gjithë ditës së djeshme vizita inspektuese në dhomat e paraburgimit ku ishin qytetarë të ndaluar pas pjesëmarrjes në protestën e djeshme në Rrugën e Kombit.
Elementi tjetër shqetësues nga ana proceduriale në rastin e arrestimeve të qytetarëve nga Kukësi që ndodhen aktualisht në komisariatet e Tiranës, është mungesa e dokumentacionit shoqërues për ndalimin e tyre dhe mos-vënia formalisht në kohën e duhur në dijeni e të ndaluarve për arsyet e ndalimit.