Nënë Limja nga Shkodra është shëruar nga COVID-19 dhe ka lënë ambientet e spitalit “Shefqet Ndroqi”. 85-vjeçarja ia ka dalë të fitojë luftën e vështirë me koronavirusin edhe pse kishte pneumoni dhe disa sëmundje bashkëshoqëruese dhe ka shkuar pranë gjirit të familjes.
Ministrja Manastirliu ka publikuar lajmin duke falenderuar mjekët që kontribuan në shërimin e saj. Ajo ka theksuar se 10 qytetarë janë shëruar në 24 orët e fundit dhe në total janë 605 nga fillimi i epidemisë.
“Nënë Limja, 85-vjeç nga Shkodra, e shtruar në gjendje të rëndë në spitalin universitar “Shefqet Ndroqi” me pneumoni dhe disa sëmundje bashkëshoqëruese, ja ka dalë të shërohet nga COVID-19 falë përkushtimit dhe punës së palodhur të spitalit COVID2. 85-vjeçarja sot ka lënë spitalin dhe është kthyer pranë familjes. 10 qytetarë janë shëruar në 24 orët e fundit, 605 të shëruar nga fillimi i epidemisë”, ka shkruar Manastirliu.
