Shumica e operacioneve policore realizohen me metodën e infiltrimit të agjentëve të specializuar që në shumicën e rasteve prezantohen si blerës armësh, droge apo edhe si vrasës të paguar e përdorues narkotikësh.
Herë maskohen me tuta, atlete e kapele, e ndonjëherë me rroba firmato nga koka tek këmbët. Herë mbajnë motoçikletë e herë ndonjë automjet, prodhim të vitit më të fundit. Ose bëjnë rolin e shpërndarësit që duhet të grabisë e të bëjë krime për të siguruar dozën e ditës, ose shtiren sikur janë blerës që mbajnë vetëm sende luksoze. Pak rëndësi ka se cilën mënyrë zgjedhin sepse një rol kryejnë në çdo operacion. Janë agjentët e infiltruar të operacioneve kundër trafikut të drogës dhe armëve, të cilët shpeshherë gjenden përballë “bosëve”, duke bërë pazar për “mallin”, derisa u vënë prangat.
Shpërndarësit dhe trafikantët që bien në “rrjetën” e tyre kapen në mënyra nga më të ndryshmet. Duke besuar verbërisht tek personi që do të bëjë blerjen, shuhet komplet mundësia e frikës nga ndonjë arrestim i mundshëm. Kryesisht zgjidhen vende periferike dhe jashtë qendrave të banuara, por nuk përjashtohen dhe rastet kur shkëmbimi bëhet edhe në ndonjë lokal, bar ose restorant. Dhe atëherë kur nuk ua pret mendja kapen në flagrancë dhe personi që deri në atë moment ishte “ortaku” i tij në biznes, shndërrohet krejt papritur në polic.
Jo gjithmonë gjërat u shkojnë ashtu siç ata i planifikojnë. Edhe pse zgjedhin metodën e infiltrimit, sa efikase, ajo konsiderohet si një ndër më të rrezikshmet. Luajnë role nga më të ndryshmet. Që nga ai i një përdoruesi të rëndomtë hashashi e deri tek blerësit më të sofistikuar të kokainës e të heroinës. Por a janë gjithmonë të mbrojtur edhe përveç maskimit të përsosur që përdorin? Nga burime të rezervuara mësohet se edhe pse metoda rezulton e suksesshme në pothuajse 100% të rasteve, ekziston dhe rreziku i zbulimit. Sipas burimeve mësohet se deri tani nuk ka pasur fatmirësisht asnjë rast zbulimi apo dështimi.
Duke iu referuar të dhënave zyrtare mësohet se gjatë 5 muajve të parë të këtij viti vetëm sektori i antidrogës ka zhvilluar 9 operacione, përmes infiltrimit.