Është një arritje e madhe për shqiptaren Gerarta Ballo që të jetë kandidate e Partisë Demokratike në Itali, për zgjedhjet evropiane, ku do të sfidojë liderin e “Lega Nord” dhe njëherësh ministrin e Brendshëm të Italisë, Matteo Salvini.
Por përveç etheve të garës, Ballos i është dashur të përballet me kërcënimet që vijnë nga italianët, të cilët e kanë masakruar në rrjet duke e ofenduar me fjalë raciste dhe duke i kërkuar “të zhduket” në Shqipëri.
Pas kësaj, militantët e “Lega Nord” i kanë mësyrë Facebook-un duke e “masakruar” me komente negative dhe fjalor fyes.
KOMENTET:
- “Ia mbathët nga Shqipëria për t’i shpëtuar të majtës, komunizmit e tani që jeni në Itali doni të votoni të majtën. Jeni të çmendur. Veni në punë dhe atë pak tru që ju ka mbetur”, shkruan një qytetar me O.L.
- “Kjo është një tjetër shërbëtore e false. Shko në vendin tënd të predikosh, e poshtër”, komenton G.B.
- “Me gjithë respektin, por pse nuk merresh me vendin tënd, shkruan një tjetër. E nuk jam racist ta dish”.
- “Shko kandido në Tiranë”, “Kthehu në vendin tënd,” Nëse je e zonja shko dhe kandido në Shqipëri”.
- “Atëherë je shqiptare e me rrënjë myslimane”, shkojnë më tej komentet.
- “Ti nuk je italiane, kush të kërkoi, kush të do, kush pyet për ty, shko zhduku nuk na hyn në punë”.
- “Flet për regjimin e egër të komunizmit në vendin tënd e vjen e kandidon me PD që është bija e komunizmit.”
Geri Ballo në një intervistë për RTV Ora ka shprehur motivin e zgjedhjes së saj për të kandiduar me Partinë Demokratike që siç thotë ajo është një forcë politike pranë e në mbrojtje të të drejtave të emigrantëve.
