Frederik Veseli dhe Sabien Lilaj përcollën sot prononcimet e tyre për ndeshjen miqësore të së hënës me Turqinë. Gjatë gjithë kësaj jave si Lilaj, Veseli si edhe lojtarët e tjerë të skuadrës kanë punuar tërësisht dhe kanë qenë jashtëzakonisht të angazhuar për këtë ndeshje.
Për rikthimin e tij në ekipin kombetar Lilaj deklaroi: “Jam shumë i kënaqur nga ftesa e trajnerit dhe që jam i rikthyer pas kaq kohësh në kombëtare. Kam punuar si të gjithë shokët dhe ndihemi shumë mirë. Unë mendoj se do të futemi në fushë, as për barazim, por vetëm për të fituar këtë ndeshje duke njohur natyrisht edhe kudërshtarin që kemi përballë .
Kemi punuar intensivisht gjithë javës për ta përgatitur sa më mirë këtë takim”, – theksoi Lilaj. Ndersa nga ana e tij, në të njëjtën linjë, Veseli theksoi: “E kemi përgatitur këtë ndeshje me një seriozitet mjaft të lartë.
Gjatë gjithë javës jemi përqëndruar te orientimet e trajnerit. Edhe pse është thjesht një miqësore ne duam ta fitojmë dhe futemi në fushë për të dhënë dhe për të marrë maksimalen.
Një javë stërvitje që ndër të tjerash na sherben shumë në punën me njeri-tjetrin”. Skuadra kombëtare pas stërvitjes të së djelës paradite do të zhvillojë në orën 18.00 me orën lokale të Antalias seancën stërvitore në stadiumin ku do të luhet të hënën ndeshja miqësore Turqi-Shqipëri.
