Vuçiq i gatshëm të dëgjojë propozimet e shqiptarëve për pajtim

15.05.2018 21:37:40

Presidenti i Serbisë, Aleksandar Vuçiq, duke folur për një kompromis mes Serbisë dhe Kosovës, ka thënë se është gati të dëgjojë propozimet e shqiptarëve dhe Bashkësisë Ndërkombëtare, por me një kusht.

“Unë jam i gatshëm të flas për gjithçka që dikush e konsideron si zgjidhje të kompromisit. Jam i gatshëm të dëgjoj çdo propozim të shqiptarëve dhe të dëgjojë të gjitha propozimet e Bashkësisë Ndërkombëtare por këto propozime nuk guxojnë dhe nuk duhet të jenë poshtëruese për Serbinë dhe të thuhet se kjo është gjoba përfundimtare e ne të themi se jemi të moralshëm dhe lartësinë e kësaj gjobe do ta përcaktojmë e verifikojmë dhe ta vëmë në jetë”, tha presidenti serb.

“Unë jam i hapur të dëgjoj çdo propozim dhe në asnjë moment Serbia nuk është sjellë si një partner i pabesueshëm, përkundrazi”.

Vuçiq në një intervistë për televizionin Klan ka deklaruar se Serbia ka respektuar të gjitha marrëveshjet e nënshkruara.

“Ne kemi pranuar që të marrim pjesë në zgjedhjet lokale bazuar në ligjet e Kosovës dhe rregullat e Kosovës që më parë nuk ka qenë rast i tillë dhe po ashtu në zgjedhjet parlamentare. Obligim i yni në bazë të marrëveshjes së Brukselit ka qenë që këtë ta bëjmë një herë dhe e kemi bërë dy”.

“Kemi hequr dorë nga mbrojtja civile, kemi marrë pjesë në formimin e policisë rajonale në kuadër të sistemit të Kosovës, e jo të atij serb dhe të Serbisë. Kemi marrë pjesë edhe në atë që ka qenë më e vështira për ne, në sistemin gjyqësor dhe të gjitha këto gjëra tmerrësisht të vështira pra përfshirë edhe marrëveshjen e telekomunikacionit, përfshirë kodin e thirrjeve ku kemi mbajtur të drejtën për serbët që të mos kenë nevojë të thirrin numrin hyrës, por kështu ka qenë rasti”.

Ai ka folur edhe për Asociacionin e komunave me shumicë serbe, duke thënë se Kosova nuk e ka respektuar marrëveshjen e Brukselit.

“E çfarë ka përmbushur pala e Kosovës. Edhe ju jeni shqiptar dhe unë po ju pyes të ma thoni një gjë që nuk u ka shkuar për shtati. E vetmja gjë që nuk u ka shkuar për shtati e që përbën 40 për qind të marrëveshjes së Brukselit është Asociacioni i Komunave serbe, e cila nuk ekziston sot siç nuk ka ekzistuar para pesë vitesh”, tha Vuçiq.