VV reagon ndaj PDK-së: Kur partia e krimit të akuzon për vandalizëm!

26.08.2016 19:12:13

Lëvizja Vetëvendosje ka reaguar ndaj deklaratave të PDK-së, të cilët i quajtën vandalistë aktivistët e VV-së që ishin nisur sot drejt shtëpisë së Kadri Veselit në Mitrovicë për të realizuar një aksion.

Vetëvendosje përmes një reagimi për media ka thënë se partia që udhëhiqet nga kokat e krimit ka akuzuar aktivistët paqësor për vandalizëm.

“Partia që udhëhiqet nga kokat e krimit dhe korrupsionit në Kosovë, së cilës përditë po i dalin përgjime që dëshmojnë kriminalitetin e saj, sot paska reaguar ndaj aktivistëve paqësorë të Lëvizjes VETËVENDOSJE!.

Në komunikatën e saj PDK, udhëheqësit e së cilës po e falin tokën e Kosovës, paska shprehur shqetësim për pronat private të tyre. Sikur ky subjekt të shqetësohej kështu për territorin e Republikës sonë, Kosova sot do të ishte në gjendje shumë më të mirë”, thuhet në reagimin e VV-së.

Më tej në reagim thuhet se PDK paska ftuar organet e sigurisë, të cilat janë nën kontrollin e po të njëjtëve kriminelë që e udhëheqin këtë subjekt, që të shtojnë shtypjen ndaj aktivistëve tanë dhe qytetarëve të Kosovës.

“Lëvizja VETËVENDOSJE! i sheh këto reagime si panik e pushtetit në prag të rënies së tij dhe mendojmë që PDK ka të drejtë të ketë panik. Ajo po i lut qytetarët që të kenë besim në institucione pikërisht ngase e di që askush sot nuk i beson shtetit të kapur nga krimi. Shumë shpejt qytetarët do të shprehin mosbesimin e tyre në këtë qeveri përmes protestave e demonstratave masive dhe do të përfundojë periudha e qeverisjes nga krimi i organizuar”, thuhet në fund të reagimit.