Zaevi jep detaje nga ndërtimi i autostradës që lidhet me Kosovën

04.01.2019 14:22:46

Ai shtoi se shuma e projektit do të arrijë vlerën prej 120 milionë eurove, por përllogaritja përfundimtare do të jetë sipas tenderëve përfundimtarë.

Kryeministri i Maqedonisë, Zoran Zaev deklaroi se tenderi i parë për 1.9 kilometrat e para të autostradës Shkup-Bllacë, shteg që lidh Shkupin me Prishtinën, do të hapet në mesin e muajit janar.

“Publikimin e tenderit e presim gjatë mesit të janarit, për fazën e parë për 1.9 kilometra. Kemi vendosur të shkojmë në ndërtim dy fazash, që të kursejmë kohë, kurse të kemi edhe aktivitet ekonomik menjëherë. Pjesa tjetër do të jetë prej 10.4 km, ku deri në maj duhet ta kompletojmë dokumentacionin”, tha Zaev, raporton lajmpress.

Ai shtoi se shuma e projektit do të arrijë vlerën prej 120 milionë eurove, por përllogaritja përfundimtare do të jetë sipas tenderëve përfundimtarë.

Rëndësia e ndërtimit të kësaj autostrade, siç theksoi edhe vetë kryeministri Zaev, lidhet me rritjen e ekonomisë tregtare Maqedoni-Kosovë, e cila në vitin 2011 ka qenë “gati 420 milionë euro, kurse në vitin 2016 rreth 212 milionë euro”.

Përndryshe, në shtator të 2015-s, ish-ministri i Ekonomisë, Bekim Neziri pati thënë: “Prej Prishtinës do të ketë autostradë e cila do të ndërtohet deri në vendkalimin Bllacë dhe gjithashtu ne në Maqedoni veç kemi përgatitur deri në fund të vitit do të duhet të përfundojë projekti se sa do të kushtojë rruga Shkup-Bllacë dhe kështu do të lidhemi me Shqipërinë”, kishte thënë Neziri, projekt ky që u premtua nga Bashkimi Demokratik për Integrim që në mars të 2014-s.